Almaty ákimi Baýyrjan Baıbek Shveısarıanyń Federaldy keńesshisi, ekonomıka, bilim jáne zertteý Federaldy departamentiniń basshysy Iohann Shnaıder-Ammannmen kezdesti. Taraptar saýda-ekonomıkalyq baılanystardy nyǵaıtý, startaptardy qoldaý jáne «Smart city» jobalaryn júzege asyrý máselelerin talqylady.

Táýelsizdik jyldary eki el arasynda túrli baǵyttar boıynsha keń spekterlik seriktestik ornyqty, búgingi kúni Shveısarıa Qazaqstannyń úshinshi iri sheteldik ınvestory bolyp tabylady.

Almatyda saýda, medısına, qarjy jáne basqa salalar boıynsha shveısarlyq kapıtalmen 94 kásiporyn jumys isteıdi, taýar aınalymy da arta túsýde.

«Biz Qazaqstanǵa túri salada jumys isteıtin bıznesmenderdiń úlken delegasıasymen keldik. Sapardyń basty maqsaty – burynnan bar seriktestik qatynasty nyǵaıtý jáne jańa yntymaqtastyqty qalyptastyrý. Shveısarıada paıdaly qazbalar joq, sondyqtan el ekonomıkasy jańa tehnologıa men qyzmet kórsetýge negizdelgen. Almaty – jedel damyp kele jatqan megapolıs, basty áleýeti startaptardy damytýǵa baǵyttalǵan. Qalanyń geografıalyq ornalasýy, damyǵan ınfraqurylymy Almatyny búkil Orta Azıa óńiri boıynsha bıznesmenderdiń qyzmetin keńeıtýdiń aıshyqty alańyna aınaldyrady», - dep atap ótti Iohann Shnaıder-Ammann.

Sapar barysynda Almatyda batys evropalyq bıznesmendermen jergilikti iskerlik orta ókilderiniń V2V kezdesýi ótti. Shveısarlyq delegasıa arnaıy ekonomıkalyq jáne ındýstrıaldy aımaqtyń áleýetin jáne «Smart Almaty» jobalarynyń júzege asýyn kórdi.

Aıta keterligi, 2016 jyly Almaty jáne Lýgano qalalary ákimshilikteriniń arasynda saýda, ekonomıka, ǵylym, tehnologıa, sonymen qatar týrızmdi alǵa jyljytý, mádenı almasý salalaryn damytý jónindegi yntymaqtastyq memorandýmyna qol qoıylǵan bolatyn.