Amerıkalyq «World Wide Motion Pictures Corporation» kompanıasy QR Mádenıet jáne sport mınıstrligi tapsyrysy boıynsha Sh.Aımanov atyndaǵy «Qazaqfılm» AQ «Novyı mır» Prodakshn» JSHS-men birlese túsirgen «Anaǵa aparar jol» fılminiń soltústik amerıkalyq óńirde dıstrıbýsıalaý quqyǵyn satyp aldy. Esterińizge sala keteıik, atalǵan fılm byltyr Qazaqstan atynan «Oskar» jáne «Altyn globýsqa» «Úzdik shetel fılmi» atalymynda usynylǵan edi. 

Bas prodúseri Álıa Nazarbaeva, al rejıseri Aqan Sataev  ̶  bul fılmge kil juldyzdardy jınaǵan. «Anaǵa aparar jol» fılminde elimizdiń tanymal akterleri  ̶  Altynaı Nógerbek, Ádil Ahmetov, Arýjan Jazylbekova, Berik Aıtjanov, Bolat Ábdilmanov túsken. Bul epıkalyq fılmnen kórermen qazaq otbasysynyń 1930 jyldardan bastap, kúni búginge deıingi bastan keshkenin kóre alady.

«Prodúserlerimizge, túsirilim tobymyzǵa jáne maǵan da bizdiń fılmimizdi AQSH kınoteatrlarynda kórsetetini úlken abyroı. «World Wide Motion Pictures Corporation» kompanıasy fılmimizden shynaıylyqty kórip,  ondaǵy oqıǵa jelisi álemniń barlyq aýdıtorıasyna uǵynyqty bolatynyna senim bildirgenine qýanyp otyrmyn», ̵  dedi bul týrasynda rejıser Aqan Sataev.

«Bizdiń kompanıa birneshe urpaqtyń tarıhyn baıandaıtyn, onyń ústine «Oskar» premıasyna ilgeride usynylǵan tereń dramany prokattaýdy maqtan sanaımyz», ̵  degen «World Wide Motion Pictures Corporation» kompanıasynyń bas dırektory Pol D. Henkok sózin bylaı dep jalǵastyrdy: «Amerıkalyq otbasylar, ásirese analar qaýymy janǵa jylý syılaıtyn fılmdi qýana kóredi».

«Anaǵa aparar jol» fılmi AQSH (iri megapolısterge de) shekteýli prokatqa bıyl kúzde túrli qazaqstandyq jáne azıa-amerıkalyq uıymdardyń qoldaýymen shyǵady.

Aıta ketelik, «Anaǵa aparar jol» fılminiń tusaýkeseri 38-shi Halyqaralyq Máskeý kınofestıvalinde ótip, synshylardyń oń baǵasyn alǵan. Sonymen qatar, fılm túrli kınofestıvalderden júlde alyp, halyqaralyq kórsetilimderi ótken. Sońǵysy  ̶ 19 shilde kúni Vashıngtondaǵy Karnegı ınstıtýtynda N.Á.Nazarbaevtyń bastaýymen jasalǵan «Rýhanı jańǵyrý» baǵdarlamasy aıasynda ótti.