Tiri adamdy óldiniń qataryna jatqyzý bizdiń Qazaqstanda sırek oryn alatyn jaǵdaı emes. Tipti bir adam eki ret óledi. Ánshi Qajymurat Sheshenqul emhanaǵa barsa, "siz ólgensiz" degen jaýapty estigende tań qalǵannan tóbe shashy tik turǵan. Sumdyq jaıtty ánshi Almaty arnasyna áńgimelep bergen eken.

 «Ortaq bazaǵa kirip, meniń derekterimdi engizdi. Aqparatqa sensek, men 2013 jyly qaıtys bolǵan azamatpyn» deıdi Qajymurat. Eń qyzyǵy, mundaı jaǵdaıdy Qajymurat basynan birinshi ret keship jatqan joq. 2013 jyly týǵan inisin óltirip ketipti. İnisiniń qazasynan keıin bir jyl ótken soń mashınany óz atyna aýdarý kezinde inisimen birge óziniń de marqum sanatynda ekenin bilgen.

«2014 jyly bazada meni «ólgen» dep tirkepti. Uzaqqa sozylǵan dáleldeý prosesinen keıin quzyrly organdar qatelikterin moıyndady. Sodan beri tórt jylda bári jaqsy bolatyn. Al, endi bári qaıtadan bastaldy. Jeke kýáligimdi de aýystarǵanmyn. Ózim tirimin be, ólimin be, bilmeı qaldym» depti Qajymurat Sheshenqul.

HQKO-na barǵan Qajymurat óziniń shaǵymyn jetkizedi. Belgili bolǵandaı, qujattary boıynsha bári durys. Iaǵnı tiri.

«Bizge bir klıent «emhanaǵa barsam, sen tirilerdiń qatarynda joqsyń dep aıtty» dep shaǵymdanyp keldi. Biz óz bazamyzdy tekserdik. Bári durys. Demek emhananyń bazasyn jańartý shart» dedi HQKO Medeý aýdandyq basqarmasynyń bólim jetekshisi Sabına Taýan.

Emhanadaǵylar bolsa, bazany ýaqytyly jańartyp otyratyndaryn aıtyp álek boldy. Degenmen ózderinen ketken qatelikti moıyndap otyr.