Bishkek mańyndaǵy taýda tas kóshkininen qaza tapqandar ǵylymı-zertteý ınstıtýtynyń qyzmetkeri ekeni anyqtaldy. Odan bólek 3 qazaqstandyq azamat túrli jaraqat alǵan. Taý tastarynyń qulaýynan zardap shekkenderdi qutqarý operasıasyna «Qazavıaqutqarýdyń» tikushaǵy jóneltilgen edi. Qazir olardy elge jetkizý sharalary qolǵa alynǵan. Qutqarý operasıasy jóninde Eýrazıa birinshi arnasy habarlaıdy.
Bishkek qalasynan 40 shaqyrymdaı jerdegi Skrábın muzdyǵy. Osy jerde bir top saıahatshy taýdan qulaǵan tastardyń astynda qalyp qoıǵan. Saldarynan 3 qazaqstandyq azamat jaraqat alyp, bir adam qaza tapty. Marqum 42 jastaǵy Almaty qalasynyń turǵyny Vıtalıı Dvoreskıı bolyp shyqty. Ol Ǵylymı-zertteý ınstıtýtynda jumys istegen eken.
Al jaraqat alǵan taǵy bir qazaqstandyq 50 jastaǵy Maqsat İrgebaev ekeni anyqtaldy. Ol sport jáne týrızm akademıasynda oqytýshysy. Olar Qyrǵyzstan jáne Reseılik áriptesterimen 6 myń shaqyrym bıiktiktegi taýǵa kóterilý kerek bolypty. Jýyrda ǵana Bolgarıada doktorlyq dısertasıasyn qorǵaǵan ol shet elden kelgen soń úıinde eki-úsh kún ǵana bolyp, osy saparǵa attanǵan eken.
«Meniń ákem jańa ǵana zvondaǵan. Erteń nemese búrsigúni kelem dep. Biraq, ákem basqa nomermen zvondaǵan. Ony basqa bireý dep oıladym» - deıdi Maqsat İrgebaevtyń 12 jastaǵy uly Jandos Islamov.
«Bıylǵy jyly 6 myń km baǵyndyrý kerek bolatyn. Ol taý Qyrǵyzstannyń aýmaǵynda. Ol aıtty bizge programma boıynsha, 15-shi tamyzǵa deıin kelýi kerek. Biraq, búgin tańerteń bizge qońyraý shalyp, erteń nemese búrsigúni kelemiz dedi» - deıdi Maqsat İrgebaevtyń ákesi Islam.
Skrábın muzdyǵyna shyǵyp, zertteý jumystaryna kirispek bolǵan ǵalymdarǵa tas kóshkini kedergi bolǵan. Aldyn ala derek boıynsha, tastardyń qulaýyna jer dúmpýi sebep bolýy múmkin. Dereý oqıǵa ornyna jetken «Qazavıaqutqarý» tikushaǵy taýda qalyp qoıǵan azamattarǵa kómek kórsetken.
«Búgin saǵat onda tikushaq baryp, tas kóshkininiń astynda qalǵan marqumnyń denesin alyp ketti. Zardap shekkenderden jaýap alynyp, qajetti sharalar jasalyndy. Shamamen túski bir jarym shamasynda ushaq Almatyǵa qonyp, qaıtys bolǵan azamattyń denesi Almaty qalasynyń İshki ister departamentine berildi» - deıdi QR İshki ister mınıstriniń orynbasary Iýrıı Ilın.
Evakýasıa barasynda muzdyqtan Reseıdiń úsh azamaty men Qazaqstannyń úsh azamaty, sondaı-aq qaza bolǵan bir qazaqstandyq shyǵarylǵan. Zardap shekken eki kisi Almaty qalasynan bolsa, taǵy biri Óskemen qalasynyń turǵyny. İshki ister mınıstiriniń orynbasarynyń aıtýynsha, qazir jaraqat alǵan týrıserdiń ómirine qaýip tónip turǵan joq.
