Astana qalasy ákimdiginiń Mádenıet jáne sport basqarmasy  L. Gýmılev atyndaǵy Eýrazıa Ulttyq ýnıversıtetiniń K.Aqyshev atyndaǵy arheologıa ǵylymı-zertteý ınstıtýtymen birlesip memleket qorǵaýyndaǵy Kúıgenjar qorǵanynda qazba jumystaryn júrgizip jatyr, dep habarlaıdy Qamshy.kz aqparat agenttigi Astana qalasy ákimdiginiń resmı saıtyna silteme jasap.

Instıtýt arheologtary eki apta boıy tynymsyz eńbek etip, zertteý jumystary barysynda qorǵannyń joǵarǵy qabatyndaǵy bastapqy jeti qabir ashylyp, zerttelgen. Arheologtar tobynyń jetekshisi, tarıh ǵylymdarynyń kandıtaty, K. Aqyshev atyndaǵy arheologıa ǵylymı-zertteý ınstıtýtynyń dırektory Maral Habdýlınanyń aıtýynsha, jerleý rásimi boıynsha zırattar jobamen 15-16 ǵǵ. jatqyzylǵan.

"Aıta keteıik, olar musylman dástúrimen jerlengen. Jalpy qorymnan ázirge jeti qabir qazyldy. Osy jeteýdiń ishindegi eki moladan áshekeıler tabylyp otyr, bireýin biz áıel adamnyń qabiri dep otyrmyz, onyń ishinde qola syrǵa men kúmis jip boldy. Al ekinshisin boıjetken qyz balanyń qabiri dep topshyladyq, sebebi tabylǵan neke júzigi jerlengen máıittiń oń saýsaǵynda boldy", — dedi arheologıalyq toptyń jetekshisi Maral Habdýlına.

Qorǵan Qaraǵandyǵa baratyn jolda Kúıgenjar shatqalynda ornalasqan. Qazirgi kezde saqtar qorǵanynyń shetinde qazaq zıraty bar. Taspen jabylǵan qorǵannyń bıiktigi 4 m, dıametri — 60m. Onyń granıt tastary Nura ózeniniń jaǵasynan alynǵany belgili.

"Qorymǵa qarap otyrsańyzdar jer qatparynan da baıqalady. Topyraq qabaty sary, qońyr tústi. Biz osy qorymnyń naqty qaı ǵasyrǵa jatatynyn anyqtaý úshin tórt bas súıektiń azý tisi men aldyńǵy tisterin alyp Italıaǵa, al antropologıalyq synama júrgizý úshin súıekterdi Almatyǵa jiberemiz. Onda adamnyń shyǵý tegin, damýyn, dene qurylysyn, násildik erekshelikterin anyqtaıdy", — deıdi Maral Habdýlına.