Alǵash ret Almatydaǵy «Saıran» ózeninde trıatlon boıynsha Azıanyń ashyq kontınentaldy Kýbogi bastaldy, munda 16 eldiń, sonyń ishinde Avstralıanyń, Belgıanyń, Japonıanyń, Ońtústik Koreıanyń jáne basqalarynyń 60-tan astam atletteri medaldar úshin kúresetin bolady.

Halyqaralyq sport saıysy eki kúnge sozylady. Birinshi kúni júgirýden, júzýden, velosportynan kásibıler jarysqa túsedi, al ekinshi kúni ár túrli jastaǵy tirkelgen 150-den astam áýesqoılar básekege qatysady.

«Biz qazirgi kezde qala turǵyndarynyń belsendi jáne salaýatty demalýy – velosıped tebýi, júgirýi, jaıaý júrýi úshin úlken múmkindikterdi jasaýdamyz. Qalada 68 kılometr velojoldar abattandyryldy, taıaý jyldary biz olardy 100 kılometrge deıin jetkizemiz, aýlalarda sport alańdaryn jasaý jalǵasýda, jaıaý júrginshige basymdyq beretin kósheler jasalýda. Osynyń barlyǵy qala turyndary men qonaqtaryna jaıly bolý úshin atqarylýda. Qazirgi kezde stýdentter arasynda fýtzaldan ótetin álem Chempıonatyna daıyndalýdamyz, halyqaralyq alqaly saıys bizdiń qalamyzda tamyz aıynyń sońynda ótedi, oǵan álemniń 24 eliniń sportshylary qatysady», - dep atap ótti óziniń quttyqtaý sózinde Almaty ákimi Baýyrjan Baıbek.

Jarysqa daıyndyq barysynda Saıran ózeniniń jaǵalaýyn abattandyrýǵa qatysty aýqymdy jumystar júrgizildi. «Taza qalada ómir súr!» aksıasy barysynda sý arnalary tazartyldy, 6 tonnadan astam qoqys shyǵaryldy, balalar jáne sport alańdary salyndy, sonyń ishinde fýtbol alańy men uzyndyǵy 5 km bolatyn júgirý joly iske qosyldy.

Aıta keterligi, jyl basynan beri Almatyda 250 myńnan astam adamdy qamtyǵan 2,5 myńnan astam sporttyq jáne deneshynyqtyrý-saýyqtyrý sharalary ótti, sonyń ishinde 2,5 myńnan astamy múmkindigi shekteýli azamattar.

Qalada ulttyq sport túrlerin damytýǵa úlken nazar aýdarylady. Qalanyń barlyq aýdandarynda qazaq kúresi boıynsha seksıalar ashylǵan, qazaqtyń ulttyq «beldesý» kúresi qaıta jańǵyrdy, Almaty ıpodromynyń jumysy qolǵa alyndy.

«Sport meniń aýlamda» jobasy boıynsha sportpen turaqty aınalysatyn 18 myńǵa jýyq balalardy qamtıtyn aýladaǵy sport alańdarynyń sany artty. Turmysy tómen otbasylardyń balalaryn sportqa keńinen tartatyn jáne jeke sport uıymdaryn tikeleı kompensasıalaıtyn «Batyl bol» jobasy júzege asty.