Búgin Maqtaaral aýdany ákiminiń apparatynda aýdandyq derbes bólim basshylary jáne 2 kent, aýyldyq okrýg ákimderiniń qatysýymen keńeıtilgen apparat májilisi ótti. Aýdan ákimi Baqyt Asanovtyń tóraǵalyǵymen ótken jıynda hattamalyq tapsyrmalardyń oryndalý barysy talqylandy.
Jıynda baıandama jasaǵan aýdan ákiminiń orynbasary B.Tórebekov eń aldymen oryndalǵan tapsyrmalardy atap ótti. Hattamalyq tapsyrmalarǵa sáıkes, «Maqtaaral ákimi apparaty» memlekettik mekemesiniń Erejesi ázirlenip, bekitilgen. Sondaı-aq, aýdan aýmaǵyn bólý jolymen «Maqtaaral» jáne «Jetisaı» aýdandarynyń qurylýyna oraı memlekettik qyzmetkerlerge habarlama jobasy ázirlenip, tanystyrylǵan. Aýdan ákimi apparatynyń, derbes bólimder jáne 2 kent, aýyldyq okrýg ákimdikteriniń shtattyq qurylymy aýdan ákiminiń qaýlysymen qaıta bekitilgen. Sonymen qatar, memlekettik qyzmetkerlerdiń biliktilik talaptary men laýazymdyq nusqaýlyqtary ázirlengen.
B.Tórebekov aýdan ákimi apparatynyń ǵımaratyn jóndeýden ótkizý úshin aqaý aktisi men smetalyq eseptemeleri jasalǵandyǵyn da atap ótti. Sondaı-aq, tapsyrmada kórsetilgendeı aýdan ákimdiginiń jumyspen qamtý jáne áleýmettik baǵdarlamalar bóliminiń Myrzakent kentinde ornalasqan ǵımaraty áktelip, syrlanyp, qasbeti men aýmaqtary retke keltirilgen.
Aýdan ákiminiń orynbasary B.Tórebekov merziminen keshikken tapsyrmalardyń oryndalý barysy týraly da baıandady. Óz kezeginde aýdan ákimi B.Asanov jaýapsyzdyq tanytyp, jumysyna nemquraıly qaraǵan basshylarǵa eskertý jasap, berilgen tapsyrlamalardy ýaqytyly ári sapaly oryndap otyrý kerektigin aıtty.
«Men taǵy qaıtalap aıtamyn. Eger, jumysty uıymdastyra bilmeseńizder, berilgen tapsyrmalardy ýaqytyly oryndaı almasańyzdar oryndaryńyzdy bosatyńyzdar. Qanshama halyq bizge qarap otyr. Biz olardyń talap-tilegin oryndap, aýdandy kórkeıtip, barynsha damytýymyz kerek» - dedi Baqyt Násirhanuly.
Jıyn barysynda aýdandyq turǵyn úı-kommýnaldyq sharýashylyq, jolaýshylar kóligi jáne avtomobıl joldary bóliminiń bas mamany B.Mambetov ótken aptada uıymdastyrylǵan senbiliktiń nátıjesi týraly baıandama jasady. Sondaı-aq, aýdan aýmaǵynda júrgizilip jatqan qurylys nysandarynyń ahýaly týraly aýdandyq sáýlet, qala qurylysy jáne qurylys bóliminiń bas mamany B.Anarbekov esep berdi. Al, sóz kezegin alǵan aýdan ákimi apparaty jalpy bólimniń basshysy D.Asabaev aýdan ákiminiń turǵyndardy jeke qabyldaý sharalaryn uıymdastyrý barysy jáne kiris-shyǵys qujattarynyń aınalymy týraly baıandady.
