Túrkistan oblysy Abaı aýylynda zorlanǵan balaǵa qatysty is toqtatyldy, - dep habarlaıdy Tengrinews.kz.

Bas prokýratýranyń tergeý toby Túrkistan oblysy Abaı aýylynda seksýaldyq zorlyq qurbany bolǵan balaǵa qatysty qozǵalǵan isti toqtatty.

"Oqıǵanyń shynaıylyǵyn anyqtaý maqsatynda barlyq sot saraptamasy júrgizildi: medısınalyq, psıhologıalyq-psıhıatrlyq, bıologıalyq, molekýlárlyq-genomdyq jáne taǵy basqalary. Zardap shekken taraptyń ókilderi Reseı Federasıasynan, Qyrǵyzstannan jáne Grýzıadan jekemenshik jáne memlekettik sarapshylardy shaqyrýdy surady. Sondaı-aq, mamandar retinde túrli salalardaǵy balalar dárigerleri jumyldyryldy", - dep habarlady prokýratýranyń baspasóz qyzmeti.

Osy is boıynsha 14 keshendi sot saraptamasy men 4 túrli zertteý júrgizilgeni aıtylady. QR Qylmystyq kodeksiniń 15-babynyń 2-bóligine sáıkes, seksýaldyq zorlyq úshin jaýapkershilik 14 jastan bastalady.

"Tórt kúdiktiniń ishinde tek bireýi 14 jasqa jetken. Onyń áreketi QR Qylmystyq kodeksiniń 121-babynyń 4-bóligine sáıkes dep tanyldy. Qalǵandaryna qatysty qylmystyq is toqtatyldy. Sebebi olar 14 jasqa tolmaǵan. Oqıǵanyń basqa mán-jaıy jarıalanbaıdy", - dep habarlady Bas prokýratýra ókilderi.

Eske sala keteıik, osyǵan deıin qoǵam qaıratkeri Arýjan Saın Abaı aýylynda zorlanǵan ekinshi balaǵa qatysty mán-jaıyn aıtyp bergen bolatyn.

Naýryzdyń ortasynda OQO-nyń Saryaǵash aýdanyndaǵy Abaı aýylynda jeti jasar bala zorlandy degen aqparat Jelide taraǵan bolatyn. Balany jabylyp zorlaǵandar joǵary synyptyń oqýshylary bolýy múmkin. 

Keıinirek OQO İİD ókilderi bul derekke qatysty QR Qylmystyq kodeksiniń 121-babynyń 4-bóligi ("Seksýaldyq sıpattaǵy zorlyq-zombylyq áreketteri") boıynsha qylmystyq is qozǵalǵanyn habarlaǵan edi.