Osyǵan deıin Almaty oblysy Sarqan aýdanynyń ákimdiginiń saldarynan «Syrovátskıı» sharýa qojalyǵy jer aýmaǵynan aırylyp qala jazdaǵan. Belgili bolǵandaı sharýa qojalyǵy basshysynyń óliminen keıin aýdandyq jer qatynastary bólimi ýchaskeni ıesiz jer dep tanyp, úshinshi tulǵaǵa ýaqytsha jalǵa berý týraly qaýly shyǵarǵan, dep habarlaıdy Qamshy.kz aqparat agenttigi. 

Atalmysh másele oblystyq Kásipkerler palatasynyń Kásipkerlerdiń quqyǵyn qorǵaý jáne sybaılas jemqorlyqqa qarsy is-qımyl keńesiniń kezekti otyrysynda qaralyp, onda kásipkerdiń jesir áıeli Nadejda Syrovátskaıa jergilikti atqarýshy organnyń áreketine shaǵymdanǵan.

Kásipkerler palatasynda memlekettik organ istiń mán-jaıyn anyqtamaı, jerdi ýaqytsha paıdalaný quqyǵyn úshinshi tulǵalarǵa berý týraly asyǵys sheshim qabyldaǵanyn atap ótti. Sonymen birge, Azamattyq kodeks boıynsha mura muragerlik ashylǵan ýaqyttan bastap alty aı merziminde tapsyrylýy tıis.

«Másele qaralǵan soń, Kásipkerlerdiń quqyǵyn qorǵaý jáne sybaılas jemqorlyqqa qarsy is-qımyl keńesi  Sarqan aýdanynyń jer qatynastary bóliminiń sheshimi boıynsha zańdylyq pen negizdilikti anyqtaý úshin Memlekettik qyzmet isteri jáne sybaılas jemqorlyqqa qarsy is-qımyl departamentine materıaldardy joldady», - dedi Kásipkerler palatasynyń sarapshysy Dýman Kerimbaev.

Departament jer ýchaskesi boıynsha materıaldy qarastyrý barysynda Sarqan qalasynyń ákimi apparatynyń bas mamany sharýa qojalyǵynyń basshysynyń qaıtys bolǵany týraly anyq emes málimet bergenin anyqtady. Bul óz kezeginde negizsiz sheshimniń shyǵarylýyna sebep bolǵan.

«Jiberilgen buzýshylyqtar úshin Sarqan aýdanynyń ákimi apparatynyń bas mamany «sógis» túrindegi tártiptik jazaǵa tartyldy. Jer ýchaskesin JSHS-ǵa ýaqytsha jer paıdalanýǵa berý týraly qaýly alynyp tastalyndy. Jer ýchaskesi zańdy muragerlerge qaıtaryldy», - delingen Almaty oblysy boıynsha Memlekettik qyzmet isteri jáne sybaılas jemqorlyqqa qarsy is-qımyl departamentiniń basshysy Serikbaı Nurǵısaevtyń resmı jaýabynda.