Búgin «Azamattarǵa arnalǵan úkimet» memlekettik korporasıasynyń mamandary Almatydaǵy mektep jármeńkelerine kelýshilerge ESQ, aqparattyq anyqtamalar berdi jáne mobıldik azamattar bazasyna tirkedi. Jańa oqý jylynyń qarsańynda korporasıa fılıaly oqýshylardyń ata-analary kóp jınalatyn oryndarǵa qyzmet kórsetý sektorlaryn ashty.
«Jyl saıyn jańa oqý jyly qarsańynda Memlekettik korporasıanyń front-ofısterinde mektepter men balabaqshalar suratatyn qajetti anyqtamalardy alý úshin ata-analar legi kóbeıedi. Biz jumystaǵy ata-analardyń ýaqytyn únemdeý úshin mektep jármeńkelerinde halyqqa qyzmet kórsetý sektorlaryn ashyp otyrmyz. Bul jerde mekenjaı anyqtamalaryn alýǵa bolady, aldaǵy ýaqytta memlekettik qyzmetterdi úıde nemese jumys ornynda otyryp alýlary úshin elektrondyq úkimet portalynda óz betinshe jumys isteýdi úıretemiz. Sonymen qatar, mektep nemese balabaqsha qyzmet alýshyǵa SMS-habarlama jiberip, ol rastalǵan soń anyqtamany ózderi ala beretin "Anyqtamasyz qyzmet" servısi jaıly da aıtyp túsindiremiz. Bizdiń mamandar tamyz aıynyń sońyna deıin mektep jármeńkelerine kelýshilerge qyzmet kórsetip, keńester beredi» - dedi «Azamattarǵa arnalǵan úkimet» memlekettik korporasıasy Almaty qalasy boıynsha fılıalynyń PR-menedjeri Jańyl Ápetova.
Esterińizge salsaq, "Anyqtamasyz qyzmetter" jobasy boıynsha úshinshi jaq sms-habarlama arqyly qyzmet alýshynyń kelisimimen tórt túrli anyqtamany alýǵa múmkindigi bar. Ol úshin azamattar mobıldik azamattar qorynda tirkelgen bolýy kerek, al anyqtama alatyn bolsa – ESQ bolýy tıis.
Jumys mehanızmi qarapaıym: múddeli tulǵa elektrondyq úkimet portalynda avtorızasıadan ótýi tıis. Sosyn «Úshinshi tulǵalardyń anyqtama alýy servısi» bólimin tańdap, qaı azamat týraly málimet alǵysy keledi, sonyń jeke sáıkestendirý nómirin jazýy tıis. Eger azamat mobıldi azamattar bazasynda tirkelgen bolsa, múddeli tulǵa anyqtama túrin tańdap, óziniń elektrondyq-sıfrlyq qoltańbasymen qol qoıady. Sol sátte portal avtomatty túrde azamatqa SMS-habarlama joldap, úshinshi tulǵaǵa málimet berý/bermeý jóninde sheshim qabyldaýdy suraıdy.
Mobıldik azamattar qorynda tirkelý úshin paıdalanýshy elektrondyq úkimet portalyndaǵy jeke kabınetinde telefon nómirin óz JSN-yna bekitý kerek. Nemese «Azamattarǵa arnalǵan úkimet» memlekettik korporasıasynyń kez-kelgen front-ofısine júginýine bolady.
