"Keshegi aqyn Nazerke Semeıdiń janaıqaıyn ınstagram men feısbýkke jarıalaǵannan soń, búgin ánshi Saltanat Baqaeva aqyn qyzǵa telefon shalypty. Nazerke erteńgi kúni dálelim bolmaı qalar degen qorqynyshpen ("qazirgi kezde barlyǵyn kútýge bolady. Sondyqtan sózimdi dáleldeıtin fakt kerek",- deıdi Nazerke Semeı) ol ekeýara sózderin telefonnyń dıktofonyna jazyp alypty. On jeti mınýt sóılesken áńgimeden ánshiniń bir ret bolsa da keshirim suraǵan sózin estı almadym. Ókinishti. Kerisinshe aqyn qyzǵa sóz bermeı, shúıligýde. Ol ol ma, ınstagram paraqshasyna ózin aqtap, Nazerkeni dattaǵan postyn salady. Oqyrmandar jas aqyn qyzdyń jer-jebirine jetip pikirlerin qaldyrǵan. 
"Baıǵus kónip, betpaq jeńdim" degeni me bul sondaǵysy?!
Já, ózara sheshsin deýge de bolatyn edi. Eger Saltanat Baqaeva: "Nazerke, keshirshi... Sen arqyly nanymdy taýyp, elime syıym artýda" dep jatsa? Jo-oq...Kerisinshe...
"Men arqyly ózińe haıp jasap jatyrmysyń, a?!"
"Meni kóre almaısyń..."(nesin kóre almaıdy eken? Osy ánshiler qyzyq. Ol - ánshi. Nazerke - aqyn emes pe?)
"Saǵan pıar kerek bolyp tur. Men arqyly tanylǵyń kelip júrgenderdiń bireýisiń!" deı kele, aqyn qyzdyń sózin aıaǵyna deıin estimeı, telefon tutqasyn laqtyra salady. 
Aý, Saltanat! Etıka qaıda?! 
Seniń ótirigiń battıyp shyǵýda. 
Birinshiden, "Men kompozıtor Erhanǵa "Ágýgáı"-diń qalamaqysyn tóledim" depsiń. Al, Erhan inishek: "Maǵan eshkim qalamaqy bergen joq" deıdi. Kimge senemiz? Eki adam qalamaqysyn almaǵanyn aıtýda. Aqyn jáne sazger. 
Ekinshiden, "Ádemi-aı" ánin jazar kezde aqsham bolmady" depsiń. Qalaısha bolmady?! Seniń bir toıǵa emes, ınstagramdaǵy paraqshańda elýden asa toıyń júr. Barlyǵy "Ágýgáı" ániniń arqasy. Sol án arqyly qaltańdy qalyńdattyń. Ony sen tegin júrgizbeısiń. Solaı ma? 
Tere berseń kóp nárse shyǵaıyn dep tur. 
Bilesiń be, men seniń ornyńda bolsam ne isterimdi?! 
Dál osyndaı keremet ánniń arqasynda halyq yqylasyna bólenip júrsem, eh, shirkin, sazger jas jigit Erhan men jas aqyn Nazerkeni qoltyqtap el-eldi aralatar edim. Sazgerge basqa ánshiler sekildi kólik mingizbesem de, qymbat saǵat, al aqyn qyzdyń saýsaǵyna gaýhar tastan jasalynǵan júzigin taǵa qoıar edim. Eger osy ekeýi bolmaǵanda dál búgin sen otbasyńmen Mysyr elinde júrmegen bolar ma ediń, kim bilsin?! 
Tús jerge aınalaıyn, túse ǵoı... Jerde de ádemi qarapaıym halyq bar. Jap-jas bolyp qunyqpa aqshaǵa! Súıkimińdi ketirme. 
Talaı ánshilerdi kórdik. Kórip te kelemiz. Jarqyraǵan juldyzdaı bolyp, demniń arasynda sónip ketkenin. Sol ánshiler qaıta turýǵa aıaqtary dirildep tura almaı da jatyr. Bálkim, bireýdiń nazasyna da qalǵan bolar solar, shaıtan bilip pe?! Halyq - kóteredi. Kerek deseń ózi demniń arasynda jerge túsirip jiberedi. 
Ýot, solaı...
P.S: Shyryldaǵan jas aqyn Nazerke myna vıdeony jiberipti. Aqty aq, qarany qara dep qaraıtyn ýaqyt keldi. Jeter ánshilerdi aspandatqanymyz. 
Keshegi postan keıin ánshilerge óleńniń mátinin jazyp berip júrgen aqyndarymyz da yshqyna jazýda. Endi olardyń pikirlerin oqysańyz, júregińiz aýyryp ketedi", deıdi Bıbigúl Dáýletbekqyzy. 

 

Eske salsaq, Nazerke Semeı atty aqyn Saltanat Baqaevany "án urlady" dep aıyptaǵan bolatyn. Al tanymal ánshi óz kezeginde, "Nazerke Semeıdiń maǵan taqqan aıyby negizsiz", - dep jaýap berdi.