Búginde elimizdiń oqytýshylary biliktigin arttyrý úshin oblys ortalyǵyna nemese qalalarǵa baryp arnaıy oqý kýrsynan ótedi. Bul óz kezeginde qarjylyq shyǵynǵa, ýaqyttyń kóp jumsalýyna yqpal etedi. Osyǵan baılanysty Qazaqstanda aldaǵy ýaqytta biliktilikti arttyrý kýrstary onlaın formatta usynylady dep josparlanýda.
Astanadaǵy Astana hub tehnoparkinde elimizdiń tórt vıse-mınıstrleriniń qatysýymen «Digital Arena» forýmy ótken bolatyn. Atalǵan forýmda «ashyq mıkrofon» aıdary bolyp, IT salasyndaǵy bıznes bastaýshylar vıse-mınıstrlerge ózderin tolǵandyrǵan suraqtaryn qoıý múmkindigine ıe boldy. Osy rette, qatysýshylar arasynda otandyq áleýmettik jeliniń joq ekendigi aıtylyp, bilim jáne ǵylym vıse-mınıstrine usynystar jasalǵan.
«Biz bir jyldan beri otandyq áleýmettik jeli ázirlep jatyrmyz. Biz de qazirgi tańda chat, kanal barlyǵy daıyn. Buǵan qosa, jańalyqtar bólimin daıyndap jatyrmyz. Osyǵan baılanysty biz áleýmettik jeliler arqyly qosymsha baǵdarlamalar engizgimiz keledi. Myqty ustazdardyń efırlik bilim alýlaryn osy áleýmettik jeli arqyly qamtamasyz etsek deımiz. Osyǵan qatysty sizdermen jumys istesek degen nıetimiz bar», – dep óz usynysyn bildirdi IT kompanıanyń dırektory.
Vıse-mınıstr óz kezeginde osy máselege qatysty platformalar jasalyp jatqanyn, onlaın júıe boıynsha birqatar ister atqarylyp jatqanyn basa aıtty.
«Qazir muǵalimder jyl saıyn oblysqa baryp, biliktiligin arttyrý kýrstarynan ótedi. Bul maqsatta kóptegen qarajat jumsalady. Osyǵan baılanysty biz onlaın rejımdi iske qossaq deımiz. Biz mınıstrlik osy máselege qatysty barlyq jaǵdaıdy jasaımyz ári qoldaý kórsetemiz», – dedi QR Bilim jáne ǵylym vıse-mınıstri Rústem Aıdarbekuly.
R. Aıdarbekulynyń aıtýynsha, kez kelgen uıymǵa avtomattandyrý júıesi qajet. Qazirgi tańda elimizdegi mektepterde elektrondy kúndelikter keńinen qoldanylyp jatyr.
Sondaı-aq, ol sıtýasıalyq ortalyqtar arqyly mektepterdegi jaǵdaıdy onlaın formatta baqylap otyrýdyń mańyzdy ekendigine toqtaldy.
«Sıfrlyq bilý berý resýrstary bar. Buǵan qadam basyp jatyrmyz. Osyǵan sáıkes, qazirgi tańda elimizdegi mektepterde bilimland.kz portaly jumys isteıdi», – dedi R. Aıdarbekuly.
Aıta keteıik, Astanadaǵy Astana hub tehnoparkinde elimizdegi
4 mınıstrliktiń vıse-mınıstrleriniń qatysýymen «Digital Arena» forýmy ótken bolatyn. Oǵan QR Densaýlyq saqtaý vıse-mınıstri Oljas Ábishev, Bilim jáne ǵylym vıse-mınıstri Rústem Bıǵarı, Qarjy vıse-mınıstri Rýslan Eńsebaev jáne Eńbek jáne halyqty áleýmettik qorǵaý vıse-mınıstri Narıman Muqyshev qatysty. Óz kezeginde olar elimizdegi sıfrlandyrý prosesi men «Sıfrlyq Qazaqstan» memlekettik baǵdarlamasynyń júzege asyrylý jaǵdaıyn aıtty. Sondaı-aq, jas startaperlerdiń tıimdi usynystaryn qabyl alatyndaryn, otandyq IT-mamandaryn qoldaıtyndaryn jetkizdi.
