Qalada jylý, elektr qýaty, sý jáne káriz júıesiniń tarıfteri jyldyń sońyna deıin burynǵy deńgeıde qalady, al gazǵa tipten 4 paıyzǵa tómendeıdi dep habarlaıdy Qamshy.kz aqparat agenttigi Almaty qalasy ákimdiginiń baspasóz qyzmetine silteme jasaı otyryp. Ol týraly «Nur Otan» partıasynyń qalalyq keńsesinde ótken saıası keńeste belgili boldy.
Almaty ákimi Baýyrjan Baıbek komýnaldyq qyzmetterge tarıf qalyptastyrý júıesi qala turǵyndary arasyndaǵy eń ózekti máselelerdiń biri ekenin jáne ol bıleýshi partıanyń turaqty baqylaýynda ekenin atap aıtty. Búgingi tańda 1,5 mln.-ǵa jýyq almatylyqtar komýnaldyq qyzmetterdi jergilikti búdjet esebinen shektelgen baǵa boıynsha alýda. Komýnaldyq tólemderi jalpy tabysynyń 10%-nan asatyn qala turǵyndaryna turǵyn úı kómegine qarajat bólinýde.
«Memleket basshysy negizsiz tarıfti joǵarylatýǵa jol bermeýge nusqaý berdi. Ol tikeleı adamdardyń ómir súrý deńgeıine, kásipkerlerge, baǵalarǵa, bárine áser etedi. Osy maqsatta qalalyq prokýratýramen monopolıser arasynda aýqymdy, jan-jaqty tekserý jýrgizildi. Negizsiz baǵalardy kóterý faktileri anyqtaldy. Qabyldanǵan sharalar arqasynda 1,5 mln.- ǵa jýyq azamattardyń quqyqtary qorǵaldy, 4,7 mlrd. teńgege jýyq ótemaqylyq tarıfter engizildi. Komýnaldyq qyzmet qunyn arttyrý úshin eshqandaı da negiz joq. Bizdiń almatylyqtar artyq tólem jasamaýy úshin, kez kelgen negizsiz áreketter toqtatylady. Prezıdenttiń tapsyrmasy bar jáne ol oryndalady», - dedi Baýyrjan Baıbek.
Tarıfti qalyptastyrý salasyndaǵy jaǵdaıdy baıandaý barysynda, Almaty prokýrory Berik Júıriktaev qalanyń basty qadaǵalaýshy organdar tarapynan júrgizilgen tekserý barysynda birqatar monopolıa sýbektileri jóninde shyǵyndardyń negizsiz ósýi, onyń ishinde shyǵyndardyń jasandy ósýi jáne ınvestısıalyq baǵdarlamardyń oryndalmaýy anyqtalǵanyn aıtty.
«Biz Almatyenergosbytta elektr qýatyn retteý qyzmetine tarıftik smetada jarıalanǵan sommanyń 70%-, al amortızasıalyq aýdarymdar boıynsha 30% ǵana jumsalǵanyn dáleldedik. Iaǵnı, josparlaǵan 500 mln. teńgeniń ornyna 150 mln. teńge. Nátıjesinde úsh jyl ishinde tarıfke negizsiz 1 mlrd. 370 mln. teńge bólingen. Bul somma 2018 jylǵa arnalgan tarıfti kelisý kezinde shegerilgen. Energosbyt óz kinásin moıyndap, jaýapkershilikke tartyldy. Óz kezeginde «Alataý Jaryq Kompanıasy» tótenshe retteý sharalaryn engizý esebinen elektr qýatyn berý tarıfin kóterdi. Keıinirek anyqtalǵandaı, olar bul sharany tótenshe jaǵdaı sanatyna jatpaıtyn kishigirim avarıalar men aǵymdaǵy jóndeý kerektigimen negizdegen. Bizdiń talaptarǵa sáıkes, ýákiletti organ óz sheshiminiń kúshin joıdy. Qabyldanǵan sharalarmen 2,17 mlrd. teńgege shyǵyndardy óteý úshin ótemdik tarıfteri engizildi. 2,83 mlrd. teńgege bolashaq shyǵynnyń aldy alyndy. Aǵymdaǵy tarıf 5,6%-ǵa tómendedi», - dep habarlady Berik Júırikbaev.
Qala prokýrorynyń aqparaty boıynsha, sonymen qatar QazTransGaz Aımaq–ta tekserildi. Munda ınfestısıalyq baǵdarlamanyń belgili bir sharalary oryndalmaǵany belgilendi. Prokýrorlyq sharalardyń arqasynda 425 mln.teńge ótemaqylyq tarıf engizildi. Kásiporyn 50 mln. teńgege ákimshilik jaýapkershilikke tartyldy.
«Almaty Sý» jyldan jylǵa ózderiniń jasandy qarjylyq esepterinde tehnıkalyq shyǵyndardyń eki ese artýyn kórsetedi. ıaǵnı bekitilgen 17,8% ornyna 35% kórsetedi, demek bul 70 mln. tekshe sý. Bul Taldyqorǵan jáne Qaraǵandy qalalarynyń aýyz sýdy tutyný mólsherine sáıkes keledi. Sonymen qatar elektr qýatyn satyp alý shyǵyndary esebinen de tarıf kóterilgen. Aıyrmashylyq 400 mln. teńgeni qurady. Odan bólek AO «Almaty elektr stansıasy» boıynsha tarıftik smetada otyn shyǵyndaryna 11,3 mlrd. teńge belgilengen. İs júzinde bar joǵy 10,2 mlrd.teńge ǵana jumsalǵan. Biz 110 mln. teńgege ótemaqy tarıfin engizdik», - dedi ol.
Óz kezeginde monopolıaǵa qarsy ókilderdiń esepterteýleri boıynsha, Almaty qalasynyń turǵyndary úshin ortasha eseppen bir jylda bir bólmeli páter úshin 4,2 myń teńge, eki bólmeli páter úshin 6,6 myń teńge, úsh bólmeli páter úshin 9,6 myń teńge únemdeledi.
«Tutynýshylar munyń bárin qazan aıynda óz túbirtekterinen kóre alady» - dep habarlady Qazaqstan Respýblıkasy Ulttyq ekonomıka mınıstrliginiń tabıǵı monopolıalardy retteý, básekestikti jáne tutynýshylardyń quqyqtaryn qorǵaý komıteti. Olardyń boljamdaryna sáıkes bul sharalar keler jyly energetıka men komýnaldy sharýashylyqtyń negizgi túrlerine tarıf qalyptastyrýda ózgeristerge jol bermeıdi.
Jalpy alǵanda ótken jyly Almatyda 800 shaqyrymdyq ınjenerlik komýnıkasıalar salynyp, qaıta quryldy. Tamyz aıynyń sońyna qaraı 12 shaqyrymdyq jylý jelilerin jóndeý jumystary, qoldanystaǵy gaz qubyrlaryn keńeıtý jáne 120 myńnan astam turǵyndardy sýmen qamtamasyz etetin jańa sý jelilerin salý aıaqtalady.
