Kesheli beri áleýmettik jeli qoldanýshylary arasynda rezonans týdyrǵan astanalyq aýrýhanadaǵy jaǵdaı áli de órship tur. Emdelýshi Muqaǵalı Balqybaev aýrýhana qyzmetkerinen memlekettik tilde sóıleýin talap etken edi. Alaıda 50-den asqan qyzmetkerge qurmetsizdik tanytqan emdelýshiniń ózin kinálady.

Bolǵan jaǵdaıǵa bir kóz júgirtip ótsek... Muqaǵalıǵa 27 tamyz qulaǵyna operasıa jasatyp, sol kúni keshke «Otolarıngologıa» bólimshesiniń 9-palatasyna jatqyzylǵan. 28 tamyz palataǵa tazalyq saqtaýshy orys áıel kirip, emdelýshilerge oryssha sóıleı bastaıdy. Muqaǵalı óziniń oryssha túsinbeıtinin aıtyp, memlekettik tilde sóıleýin talap etedi. Alaıda áıel qazaq tilinde sóıleı almaıtynyn aıtyp, emdelýshimen sózge kelip qalady. Artynsha palataǵa dáriger Asqat Nıkolaıulyn ertip keledi. «Dárigerim meni qorǵaıtyn shyǵar» dep sengen emdelýshiniń úmiti aqtalmady. Muqaǵalıdiń aıtýynsha, dáriger emdelýshiniń ózine tap bergen. Tipti «qazaqsha sóıle dep qaqsaı berseń, aýrýhanadan shyǵasy, shyǵarý týraly anyqtamany da orys tilinde jazyp beremin» dep «qoqan-loqy» kórsetken kórinedi.

Muqaǵalımen  tildesken biz dárigeri Asqat Nıkolaıulynyń da pikirine qulaq aspaq bolyp, habarlastyq. Emdelýshisine, qala berdi memlekettik tilge arasha túsip, qoldaıyn degen dárigerdi kórmedik. Kerisinshe, «50-den asyp qalǵan tazalyq saqtaýshyǵa qurmetsizdik kórsetti» dep Muqaǵalıdiń ózin aıyptaı bastady.

«Ózińiz oılap qarańyzshy?! Ol orys áıel ári 50-den asqan. Qazaq tilin túsinbeıdi. Ondaı adamnan qalaısha memlekettik tilde sóıle dep talap ete alasyń.. Ol áıel emdelýshige «qazaqsha bilmeımin» dep túsindirgen, biraq emdelýshi óz aıtqanynan qaıtpady», - deıdi dáriger.

Al «emdelýshiniń orys tilin bilmeıtinin eskersek she?» degen saýalymyzǵa Asqat Nıkolaıuly Elbasynyń úsh tildilik saıasatyn aıtyp, qutylǵan boldy. «Nazarbaevtyń ózi oryssha sóıleıdi. Qazaqsha sóıleı almaıtyn adamǵa sol tilde sóıle dep talap ete almaısyń. Sol sıaqty oryssha bilmeıtin adamnan da oryssha sóıleýin talap ete almaısyń» dep jaýap qatty.

Sonymen qatar Qazaqstannyń kóp ultty memleket ekenin aıtyp, ár ulttyń tiline qurmet tanytý kerektigin túsindirýge tyrysty. Buǵan orys tilinde taza sóılep, halqyn qurmettegen Abaıdy mysalǵa keltirdi.

Al «emdelýshini aýrýhanadan shyǵaryp jiberemin, anyqtamany orys tilinde jazamyn» dep aıtqanyńyz ras pa?» degen saýalymyzǵa «jala» dep qana jaýap qatty. «Ol meniń emdelýshim. Onyń densaýlyǵy úshin men jaýaptymyn. Sol úshin ony shyǵaryp jiberem degen áńgime bos sóz», - dedi Asqat Nıkolaıuly.

Bul dıalogtan túsingenimiz, ózi isine ókinip, emdelýshiden keshirim suraıtyn dárigerdi baıqamadyq.