Elimizde jańa turǵyn úı baǵdarlamasy iske qosyldy. Bul týraly búgin «Baspana» Ipotekalyq uıymynyń basqarma tóraǵasy Qaırat Altynbekov málimdedi, dep jazady.

Baǵdarlamanyń ataýy – «Baspana Hıt».

Budan buryn «7-20-25» baǵdarlamasy boıynsha birinshi turǵyn úı naryǵyndaǵy jańa baspanany alýǵa bolatyn. Al Altynbekovtiń málimdeýinshe, endigi ekinshi turǵyn úı naryǵyndaǵy baspanany nesıeleýge baǵyttalǵan arnaıy ónim ázirlendi. Ári mamandar qazaqstandyqtardyń tabysyna qatysty saraptama júrgizip, 60 myń teńge aılyq alatyn ár otbasy «7-20-25» baǵdarlamasy boıynsha páter satyp alýyna múmkindik týatyn jaǵdaı jasady.

«Eki adamnan turatyn otbasy quny 10 mıllıon teńge bolatyn páter satyp alý úshin bastapqy jarna retinde 2 mıllıon aqsha tóleý kerek. Olarǵa bul jaǵdaıda 8 mıllıon teńge nesıe beriledi. Sonda aı saıynǵy tólem 56 myń teńge bolady. Sondyqtan da eki adamnan turatyn otbasy músheleriniń tabysy 120 myń teńge bolýy tıis. Árqaısysy ortasha eseppen 60 myń teńge jalaqy alsa, onda olar páter alýy múmkin», - dedi Altynbekov.

Buǵan qosa, Altynbekov jańa baǵdarlamanyń sharttarymen de tanystyrdy. Onyń aıtýynsha, bastapqy jarna baspana baǵasynyń 20 paıyzynan bastalady. Paıyzdyq mólsherlemesi - Ulttyq banktiń bazalyq stavkasy + 1,75 paıyzdy quraıdy. Qazirgi tańda Ulttyq banktiń bazalyq stavkasy - 9 paıyz. Sáıkesinshe, atalǵan baǵdarlamanyń paıyzdyq mólsherlemesi 10,75 paıyzdy quraıtyn bolady. Nesıe merzimi - 15 jylǵa deıin.