Astanada Bas múftı Serikbaı qajy Orazdyń tóraǵalyǵymen ótken kezekti hattamalyq jınalysta din qyzmetkerlerin áleýmettik qoldaý, olardy jalaqymen qamtamasyz etý máselesi talqylandy dep habarlaıdy QMDB baspasóz qyzmetine silteme jasaı otyryp.

QMDB tóraǵasy Serikbaı Satybaldyulynyń sheshimimen múftıat janyndaǵy «Qazaqstan qajylyq qory» esebinen 100 ımamǵa 50 myń teńge kóleminde jalaqy beriletin boldy.

«Elimiz boıynsha 2058 aýyldyq meshit bar. Onyń basym bóligi ózin-ózi qarajatpen qamtamasyz ete almaıtyn meshitter. Aýylda aılyqsyz qyzmet etetin din qyzmetkerlerin tolyqtaı jalaqymen qamtamasyz etý josparymyzda bar. Alǵashqy kezeń boıynsha 100 aýyl ımamyna «Qazaqstan qajylyq qory» esebinen 50 myń teńge aılyq beriledi. Osylaısha, ımamdardyń áleýmettik máselesin kezeń-kezeńimen sheshýdi kózdep otyrmyz», – dep atap ótti Bas múftı Serikbaı qajy Oraz.

Aıta keteıik, buǵan qosa «Ýaqyp» qaıyrymdylyq qory 300-den astam din qyzmetkerine orta eseppen 50 myń teńge qarjylaı qoldaý kórsetip keledi.

Elimiz boıynsha, 2605 meshitte 6189 adam qyzmet etedi. Onyń 4 myńǵa jýyǵy – din qyzmetkeri. Jalpy din qyzmetkerleriniń 30 paıyzy ǵana tolyqqandy jalaqymen qamtamasyz etilgen.