Qazaqstanda 23 jyl boıy temeki ósiretin óriste jumys istegen 51 jastaǵy qyrǵyzstandyq Otanyna oralyp, ápkesimen qaýyshty. Apaly-sińlilerdiń kezdesýi 2018 jyldyń 19 qyrkúıeginde Bishkektegi Ulttyq Qyzyl Jarty Aı qoǵamdyq qyzmetiniń mereıtoıyn toılaý qarsańynda ótti. Atalmysh qyzmet bul kúnge deıin Qyrǵyzstannyń 135-ke jýyq otbasyn qaýyshtyrǵan.
23 jyldan keıin kezdesken apaly-sińlilerdi kórgen jurttyń kóńilderi bosap sala berdi. Býrmakan Boltoeva osy kúnge deıin ápkesiniń tabylaryna sendi, úmitin úzbedi.
«Ol Qazaqstanǵa 1995 jyly ketken. Biz qalada turatynbyz, ápkemdi aldap alyp ketti. Qyzyl Jarty Aı qoǵamyna alǵys bildiremin», - dedi Boltoeva.
21 jastaǵy Zýýra Boltoeva Osh oblysy Qara-Qulja aýdanynyń turǵyny. Qyzyl Jarty Aı qoǵamy Astanadaǵy qyrǵyz dıasporasynyń ókilderimen birigip áıeldi bir apta buryn tapty. Qujattaryn joǵaltyp alǵan Zýýra elge qaıta almady, sol sebepti temeki ósiretin alańda jumys isteýge májbúr bolǵan, buǵan qosa ash qalmas úshin mal da baqty.
«Jumys istedim, keıin kúıeýge tıdim. Kúıeýim 11 jyldan keıin qaıtys boldy. Qyzym ekeýmiz jalǵyz qaldyq. Biraq ata-enem qyzymdy tárbıeleı almaıtynymdy aıtyp tartyp aldy. Ol kezde jasy 11-de edi. Qazir qyzym Qazaqstanda turyp jatyr.
Al men qara jumysqa jegildim. Úsh túrli qojaıynmen jumys istedim. Onyń ekeýi meni uryp soǵatyn, qalaǵandaryn istetetin. Týystarymnyń meni izdep júrgenin bilmeppin. Meni izdep taýyp, Otanyma qaıtarǵan Qyzyl Jarty Aı qoǵamyna alǵysym sheksiz», - dedi Zýýra Boltoeva.
Qoǵamdyq qyzmet Astanadaǵy qyrǵyz dıasporasymen birlesip Zýýra Boltoevany úsh aı boıy izdegen. Bishkekke kelgen áıel medısınalyq tekserýden ótti. Qazir qujattary men jeke kýáligi daıyndalyp jatyr. Qyrǵyzstan Ulttyq Qyzyl Jarty Aı qoǵamdyq qyzmetiniń 25 jyldyǵyna oraı toılanǵan mereıtoıda budan da ózge qyrǵyzstandyqtar tabysty.
