KazAgroGreen kompanıasynyń bas dırektory Baqytjan Kópbaev Shymkent qalasyndaǵy aýylsharýashylyq basqarmasynyń zańsyz áreketin áshkere etpek. Kásipkerdiń aıtýynsha, qalada kúnine 30 lıtr sút shyǵaratyn buqalar bar eken-mys. Mınıstrliktiń qujatynda sút beretin sıyrlarmen qosa tizimde buqalar da bar, jaı buqa emes, sút beretin buqalar. Ári olarǵa sýbsıdıa beriledi eken. Muny «halyqtyń aqshasyn jymqyrý, jemqorlyq» degen Baqytjan Kópbaev ádildikke qol jetkizbek oıda.
«Senesizder me, Aýyl sharýashylyǵy mınıstrliginiń deregine súıensek, alǵash ret Qazaqstanda, Shymkentte kádimgi buqa 30 lıtr sút shyǵarady. Ony qalaı saýatynyn bilmeımin, biraq sút shyǵaratyn buqalar bar eken. Tipti sýbsıdıa da beredi. Kúnine 30 lıtr sút. Orta eseppen sıyrlar qysqy ýaqytta 5 lıtr sút beredi. Al buqalar 30 lıtr. Ári «sút beretin buqalarǵa» sýbsıdıa beriledi eken.
Bizdiń qoǵamdyq uıym eki jarym jyl boıy aýyl sharýashylyǵyndaǵy jemqorlyqty áshkereleýmen aınalysyp kele jatyr. Ekonomıser, zańgerler top bolyp istep jatyrmyz. Birneshe qylmysty áshkerelep, quqyq qorǵaý organdaryna ótkizip kelemiz. Al bul joly sanaǵa sımaıtyn dúnıeniń kýási boldym – buqany sıyr retinde ótkizip, buqa kúnine 30 lıtrge deıin sút tapsyrady, ókimetten sýbsıdıa alady. Ol buqany ózim kórgim kelip júr. Bul – halyqtyń qarjysyn jymqyryp júrgenderdiń áreketi», - dedi Baqytjan Kópbaev.
Vıdeony kórgen Qamshy.kz aqparat agenttiginiń tilshisi Baqytjan Kópbaevtyń ózimen baılanysty. Aıtýynsha, vıdeony túsirer buryn dálelder men qujattardy qoldaryna túsirip, birneshe ret teksergen. Quqyqqorǵaý organdary, prokýratýra, İİD ókilderi kelip, ispen aınalysýdy bastap ketti.
«Aýyl sharýashylyǵy mınıstrliginde elektrondyq baza bolmaǵandyqtan ár maldyń adam sıaqty ISJ degen nómir bar. Sol nómirmen sút beretin sıyrlardyń arasynda buqalar da bar. Muny istep otyratyn alaıaqtar halyqtyń aqshasyn jymqyryp otyr», - dedi.
Kópbaev qolyndaǵy qujattaryn bizge kórsete qoımady, aldaǵy ýaqytta jýrnalıser arasynda baspasóz máslıhatyn ótkizedi, sonda aqıqatqa halyqtyń kózi jetetinine kásipker senimdi.
