Túrkistan oblysyna resmı saparmen barǵan Elbasy rýhanı astanadaǵy etnoaýylda halyqpen kezdesip, kóne qala tarıhyna toqtaldy dep jazady Qamshy.kz aqparat agenttigi sputniknews.kz saıtynyń deregin negizge alyp.
"Halqymyz úshin tarıhy baı, taǵylymy tereń Túrkistannyń elimiz úshin orny óte bólek. Ol búkil Ortalyq Azıadaǵy eń kóne qalalardyń biri. Túrkistan — qazaq eliniń rýhanı júregi, qazaqtyń kóptegen aıaýly perzentteri máńgige jaı tapqan qasıetti qala. Osynda jerlengen 164 áıgili tulǵanyń 21-i el basqarǵan qyrandar, 30-dan astamy qol bastaǵan batyrlar, aýqymdy sóz bastaǵan bıler. Túrkistan tarıhy — kúlli qazaqtyń tarıhy", — degen Elbasy oblys ortalyǵyn Túrkistan qalasyna kóshirýdegi negizgi sebepterdi de atap ótti.
"Qasıetti Túrkistanǵa degen maqtanysh sezimi ár qazaqtyń júreginde uıalaǵan. Túrkistan tek bizge ǵana emes, kúlli túrik jurtshylyǵyna qasıetti ári qadirli meken. Halqymyzda "Mádınada Muhammed, Túrkistanda Iasaýı" degen sóz bar. Osyndaı san alýan faktorlar Túrkistandy tutas turan dodasynyń, túbi bir túrki jurtynyń rýhanı ortalyǵyna aınaldyrdy. Byltyr túrki memleketteri Túrkistan qalasyn túrik áleminiń mádenı astanasy dep jarıalady. Osyǵan oraı munda TÚRKSOIDYŃ qoldaýymen 40-tan astam is-shara ótkizildi. Túrki áleminiń mádenı ortalyǵy dep tanyldy. Osynyń barlyǵy Túrkistandy oblys ortalyǵy dep jarıalaýymyzǵa sebep boldy", — dedi memleket basshysy.
Halyq aldynda sóz sóılegen Elbasy Túrkistan oblysynyń ortalyǵyn jastar qalasy dep atady.
"Túrkistan — jastardyń qalasy. Sondyqtan jastarǵa qyzmet berý úshin, olarǵa jaqsy qalada turý múmkindigin jasaý úshin osylaı jasap otyrmyz", — degen Nursultan Nazarbaev oblys ortalyǵy tek qazaqstandyq emes, alys-jaqyn shetelden qýana keletin kóptegen týrıserdiń ordasyna aınalýy tıistigin atap ótti. Bul rette qalanyń ádemi bolýy tek ásem ǵımarattarymen ǵana emes, munda turǵan halyqtyń mádenıetimen, parasatymen baılanysty ekenin jetkizdi.
Aıta keterligi, Túrkistanǵa resmı saparǵan barǵan prezıdent jańa ákimshilik ortalyqtaǵy memorıaldy tas qalaý rásimine qatysty.
Oblys ákimi Janseıit Túımebaev Memleket basshysyna Túrkistan shaharynyń damý barysy týraly baıandama jasady. Munan soń Elbasy Qoja Ahmet Iasaýı kesenesine baryp, "Áziret Sultan" tarıhı-mádenı qoryq-mýzeıiniń damý josparymen tanysty. Sondaı-aq, prezıdent Túrkistan oblysynyń áleýmettik-ekonomıkalyq damý máseleleri jóninde keńes ótkizip, jaýaptylarǵa birqatar tapsyrmalar berdi. Odan ózge Nursultan Nazarbaev dál osy sapary kezinde birqatar sheshimder qabyldaǵanyn málimdedi.
"Búgin birinshiden, Túrkistan qalasynyń negizgi damý jobasyn bekitý úshin, ekinshiden, shahardy erkin ekonomıkalyq aımaq etip jarıalansyn degen jarlyqtarǵa qol qoıdym. Aman bolsaq, 2-3 jyldyń ishinde Túrkistan jaınap, basqa qala bolyp, eńsesi kóterilip, bárimizdiń qýanyshymyzǵa ósip órkendeıtin bolady", — dedi Elbasy.
