Qyrǵyzstan mılısıasy Qytaıdan kelgen kásipkerlerdi konteınerde ustap, olardy qorqytý faktisin tekseredi. Olar Kadamjaı aýdany Maıdan aýylyndaǵy Shambesaı kesheninde jumys isteıdi dep jazady Qamshy.kz aqparat agenttigi centralasian.org saıtynyń deregin negizge alyp.
Batken oblysy ákimshiliginiń baspasóz hatshysy Cholpon Berdıkýlovanyń aıtýynsha, tergeýdi aýdandyq ishki ister bólimi jergilikti bılikpen birge atqarady. Tergeý óz betimen jazalaý faktisi boıynsha júrgiziledi.
Berdıkýlovanyń sózine qaraǵanda, oqıǵa 25 qyrkúıekte bolǵan. Kadrlarda jergilikti halyq Qytaıdyń birneshe azamatyn qorshap alyp, olardy qorqytyp-úrkitkeni anyq kórinedi. Odan soń turǵyndar qytaı kásipkerlerin turmysqa beıimdelmegen konteınerge qamap qoıǵan.
Aıta keteıik, Shambesaı kenishinde 8 tonna altyn bar dep boljanǵan. Geologıalyq barlaý jumystary munda 2007 jyly bastalǵan, 2012 jyly altyn óndirýge lısenzıa berilgen. Sońǵy birneshe jylda lısenzıanyń birneshe qojaıyny aýysty. Qazir ony Qytaıdyń "Tıandı" kompanıasy óndirip jatyr. Bul jumystarǵa jergilikti halyq únemi kedergi keltirip keledi.
