Bul týraly búgin «Nur Otan» partıasy Tóraǵasynyń Birinshi orynbasary Máýlen Áshimbaevtyń Astanada «Prezıdenttiń bes áleýmettik bastamasynyń» júzege asyrylýyn baqylaý barysynda belgili boldy.

Azamat pen Janar Astanaǵa Balqash qalasynan kóship kelgen. Bir jyl boıy páter jaldap turǵan olar, «7-20-25» baǵdarlamasy boıynsha baspanaly bolǵan jas otbasylardyń biri. Olar qujattaryn tıisti jerlerge ótkizgennen keıin bar bolǵany 10 kúnniń ishinde óz páterleriniń kiltin qoldaryna alǵan.

«Endi bizdiń de Astananyń qaq ortasynda óz úıimiz bar. Memlekettik baǵdarlama arqyly «Millennium Park» kesheninen eki bólmeli páterge qol jetkizdik», – deıdi qýanyshy qoınyna syımaǵan Azamat Qonaev.

Máýlen Áshimbaev jas otbasyn quttyqtap, bul Elbasy bastamalarynyń naqty nátıjesi ekenin aıtty. Sondaı-aq ol bes áleýmettik bastamada kóterilgen máselelerdiń barlyǵy Astana úshin óte ózekti ekenine nazar aýdardy.

– Astana – elimizdiń bas qalasy. Ýaqyt ótken saıyn jan-jaqty damyp, turǵyndar sany da artyp keledi. Búginde elordamyzda 1 mıllıonnan astam halyq turady. Sondyqtan Astana úshin baspana eń ózekti máselelerdiń biri. Osy rette Elbasynyń bes áleýmettik bastamasy, sonyń ishinde «7-20-25» baǵdarlamasy bul máseleni sheshýge jáne qazaqstandyqtardyń óz baspanalaryna qol jetkizýine úlken septigin tıgizip otyr. Sol sebepti baǵdarlamaǵa halyq, sonyń ishinde astanalyqtar kóbirek qatysyp, múmkindikti múlt jibermeýi kerek, – dedi Máýlen Áshimbaev.

«7-20-25» baǵdarlamasynyń operatory «Baspana» ıpotekalyq uıymynyń málimetine súıensek, bıylǵy 1 shildeden bastap Astanada jalpy somasy 12,7 mlrd. teńgeni quraıtyn 840 ótinim qabyldanǵan. Onyń ishinde 8,8 mlrd. teńgeni quraıtyn 584 ótinim maquldandy.

Sonymen qatar «Nur Otan» partıasy Tóraǵasynyń Birinshi orynbasary Máýlen Áshimbaev, «Prezıdenttiń bes áleýmettik bastamasynyń» júzege asyrylýyn baqylaý jónindegi respýblıkalyq qoǵamdyq keńestiń tóraǵasy, Senat depýtaty Baqytjan Jumaǵulov jáne partıa Astana qalalyq fılıalynyń tóraǵasy, Astana qalasynyń ákimi Baqyt Sultanov bastaǵan top «Joǵary bilim berýdiń qoljetimdiligi men sapasyn arttyrý jáne stýdent jastardyń jataqhanadaǵy jaǵdaıyn jaqsartý» bastamasyn iske asyrýǵa qatysýshy «Ál-Qýat» hostelinde boldy. Búginde elordada joǵary oqý oryndary men kolejderdiń 16 myńǵa jýyq stýdenti jataqhanaǵa muqtaj. Osy máseleni sheshý úshin qalalyq ákimdik EKSPO halyqaralyq kórmesinen keıin bos qalǵan hostelderdi ýaqytsha jataqhana retinde paıdalanýdy qolǵa alǵan. Bul árıne pılottyq joba. Iaǵnı aldaǵy ýaqytta jańa jataqhanalar salynady. Biraq soǵan deıin stýdentter osyndaı oryndarda turmaq.

Aıta keteıik, bankter bıyl shilde aıynan bastap «7-20-25» baǵdarlamasy boıynsha ıpotekalyq nesıe berýdi bastap ketti. Al jeńildetilgen ıpotekany kimder ala alady? Bul saýalǵa QR Ulttyq bank tóraǵasy Danıar Aqyshev jaýap berdi. Aıtýynsha, ıpotekalyq baǵdarlamaǵa turaqty jumys bar kez kelgen adam qatysa alady. Alaıda ol azamattyń atynda baspana bolmaýy tıis. Jáne nesıe tarıhy da durys bolýy kerek. Budan buryn Elbasy «7-20-25» baǵdarlamasyn júzege asyrý úshin Ulttyq bank pen Úkimet birlesip jumys isteý kerek.

«Ulttyq banktiń, ekinshi deńgeıli bankter men qor naryǵynyń múmkindikterin iske qosý kerek. Ulttyq bank keminde 1 trıllıon teńge qarjyny tartatyn arnaıy kompanıa quryp, ony bankterdiń joǵaryda aıtylǵan sharttaryna jaýap beretin jańa ıpotekalyq nesıelerin satyp alýǵa jumsaýy qajet. Baǵdarlamany júzege asyrý nátıjesinde mıllıon qazaqstandyq baspana alý múmkindigine ıe bolady», – degen edi Nursultan Nazarbaev.