Almatydaǵy «Alataý» dástúrli óner teatrynda Respýblıka kóleminde uıymdastyrylǵan «Tulpar minip, tý alǵan» atty ulttyq baıqaýdyń jeńimpazdaryn marapattaý rásimi ótti. Atalmysh shara Almaty qalasynyń İshki saıasat basqarmasynyń qoldaýymen uıymdastyrylǵan.
Respýblıka boıynsha ulttyq baıqaýda baǵyn synap kórýge bekingen 1300-ge jýyq bala qatysty. 10-19 qyrkúıek aralyǵynda ár aýdanda irikteý sharalary uıymdastyrylyp, árbir aýdannan 3 jeńimpaz anyqtalyp, 8 aýdannan jalpy 24 bala qalalyq qorytyndy kezeńge joldama alǵan.24 balanyń ishinen úzdik bolyp oza shaýyp júldeli oryndardy ıelengen úsh qatysýshy arnaı syı-syıapattarmen marapattaldy.
Mánshúk Arystanbek, Shyńǵysqan Armıa jáne Sanat Ǵazızuly atty baıqaý qatysýshylary yntalandyrý syılyǵyna ıe boldy. Úshinshi orynǵa №152 mektep-gımnazıasynyń 9-synyp oqýshysy Bekzat Shardarbek ıe bolsa, ekinshi oryn №178 lıseıdiń 6-synyp oqýshysy Abylaı Berdashevke buıyrdy. Respýblıka kóleminde uıymdastyrylǵan bul baıqaýda barlyq qatysýshylardan oza shaýyp, júldeli birinshi orynǵa №180 mekteptiń 9-synyp oqýshysy Arýjan Absattar ıe boldy. Belgili bolǵandaı, úshinshi oryn ıegerine 500 000 tg, ekinshi orynǵa 1 mıllıon berse, birinshi oryn ıegerine 1 500 000 tg kóleminde qarjylaı syıaqy tapsyryldy. Sonymen qatar, tek baıqaýǵa qatysýshylar ǵana emes, olardyń tálimgerleri de Oksford qalasyna baryp tildi jetik meńgerýge joldama aldy.
«Táýelsiz eldiń balasy tulpar minedi, tý alady. Elbasymyzdyń bastamasymen, Rýhanı jańǵyrý baǵdarlamasynyń negizgi mindeti bizge babamyz ańsaǵan táýelsizdigimizdi baıandy etý. Joba bastalǵaly beri oqýshylarymyz qansham kezeńderden ótti. Uıymdastyrýshylarmen, qazylar alqasymen aqyldasa otyryp dúnıege kelgen bul joba qazaqtyń talaı balasynyń rýhyn kóterip, ulttyq sezimin arttyra túskenine senimdimiz. Tek qazaq halqyna ǵana emes, barsha túrki halyqtaryna ortaq «Alpamys jyryn» jattatqyzý arqyly biz jastarymyzdyń rýhyn shyńdadyq jáne bolashaqta Elbasymyz aıtqandaı básekege qabiletti etýge bir qadam bolsa da alǵa jol ashtyq dep bilemin», - dedi Almaty ákiminiń orynbasary Arman Qyryqbaev.
Atalmysh baıqaýdyń qazylar alqasynyń quramynda Ómirbek Aıtbaev, Ýalıhan Qalıjan, Qalı Sársenbaı, Tynysbek Qońyratbaev, Temirhan Tebegenov, Serikqazy Qorabaı jáne Mamaı Ahmet syndy ǵalymdar men qalamgerler bolǵan.
