Túrkistan oblysynda mektep oqýshysy qurdastarynan zorlyq kórgenin aıtyp, shaǵymdandy. Bul joly da oqıǵa Saryaǵash aýdanynda mektep oqýshylary arasynda bolǵan. 13 jastaǵy bala bir mektep-ınternatta oqıtyn óziniń qurdasy men onyń 9-shy synyptaǵy aǵasynan bir jyl boıyna jábir kórgenin aıtady. Sonyń saldarynan oqýshy dertke shaldyqqan. Mektep ishindegi bul áreket jaıly tipti tárbıeshiler de bilgen kórinedi. Bul týraly Qamshy.kz aqparat agenttigi KTK arnasyna silteme jasap habarlady.
Mektep-ınternatta kórgen qorlyǵy jaıly bala anasyna da, tipti, týǵan aǵasyna da kópke deıin lám demeı júrgen. Tek synyptastarynyń biri bólmedegi jaıtty sýretke túsirip alyp, ony ózge uldar arasynda taratyp jibergen soń aıtýyna týra kelipti.
"Jatqyzyp qoıyp, dambalymdy sheshti. Birinshisi Baǵlan, ekinshisi Jasulan. Bólmede aıqaıladym, eshkim estimedi. Dálizge shyǵyp aıqaılaıyn dep edim, uryp tastady. Aıtatyn bolsań, byt-shytyńdy shyǵaramyn dep qorqytty", - deıdi jábirlenýshi.
Al aıyptap otyrǵany óziniń aýyldastary eken. Anasynyń aıtýynsha, olardyń týystary da, mektep basshylyǵy da «shý shyǵarmaıyq» dep aqsha usynǵan kórinedi.
"Oıbaı, aýyldaspyz ǵoı, kórshilespiz, uıat bolady dedi ınternattyń meńgerýshisi men mektep dırektory. «Qansha bereıik? Osy isti jaba salaıyq? Bárimiz qazaqpyz ǵoı? Nemenege jan-jaqqa jaıasyń? Jaıma!» deıdi. Meniń balamnyń ómiri ǵoı dep urystym olarǵa", - de kúıindi jábirlenýshiniń anasy.
Al zorlyq-zombylyq byltyr qyrkúıekten bastalǵan kórinedi. Sonda bala birden tárbıeshi aǵaıyna aıtqan. Alaıda KTK tilshileri ony izdep taba almaǵan. Sóıtsek, ol osy aıdyń 10-y kúni polısıaǵa aryz tússe, 13-i kúni jumystan ketip qalǵan. Al mektep basshylyǵy bizde mundaı jaǵdaı bolýy múmkin emes dep otyr.
"Jan jaqty zerdeleý jumystaryn júrgizip jatyrmyn. Ondaı jaǵdaı bolý múmkin emes dep bir bólmede jatqan oqýshylardyń ózderi aıtyp jatyr. Ata-anasymen sóılestik. Bitimgershilikke shaqyrdyq. Eki jaqty tabystyrýǵa bir áreket jasap kórdik. Bul ispen qazir polısıa aınalysyp jatyr", - dedi mektep dırektory Talǵat Ahmetov.
Porlısıanyń dereginshe, sotqa deıingi tergeý amaldary bastaldy.
"Qazirgi tańda QR Qylmystyq kodeksiniń 121-baby boıynsha, ol «seksýaldyq sıpattaǵy is-áreketter», sotqa deıingi tergeý amaldary júrgizilýde. Saraptamalar taǵaıyndaldy. Osy oqıǵanyń mán-jaıy polısıa qyzmetkerlerimen anyqtalýda", - dedi Túrkistan oblystyq İİD resmı ókili Saltanat Qarakózova.
Soraqysy sol, jasóspirimniń aıtqanyna qaramastan tárbıeshisi bıyl da uldardy birge jatqyzypty. Anasynyń aıtýynsha, osy qorlyqtan soń bala úlken dáretin ustaı almaı qalǵan. Ony teksergen almatylyq dárigerler tik isheginde jaraqat baryn aıtypty. Al tyr-jalańash sýreti oqýshylar arasynda tarap ketken jasóspirimniń ózi mektepke endi múldem barǵysy joq.
