1 qyrkúıekte Atyraý oblysyndaǵy mektepterge 118 myń oqýshy keldi, onyń 15 myńnan astamy bilim oshaǵyna alǵash ret qadam basýshylar.
Oqý jyly jarqyn jańalyqtarmen jáne alǵashqy qońyraý saltanatymen bastaldy. Atyraý oblysynyń ákimi Nurlan Noǵaev saltanatty sharaǵa qatysyp, tilegin arnady.
-Barlyq ustazdardy, ata-analar men oqýshylardy jańa oqý jylymen quttyqtaımyn. Sonyń ishinde mektep tabaldyryǵyn alǵash ret attap otyrǵan balalar úshin búgin mereke. Mektepten alǵan bilimderińiz bolashaq ómirlerińizge joldama beredi. Óskeleń urpaqtyń kásibı, sapaly bilim alýyna qajet jaǵdaıdyń bárin jasaýǵa tıispiz. Memleket basshysynyń saıasaty bizdiń táýelsiz elimizdiń nyǵaıýyna baǵyttalyp otyr, - dedi Nurlan Noǵaev. - Ekonomıkany damytý, azamattarymyzdy áleýmettik jaǵynan qorǵaý, ómir súrý deńgeıin kóterý qazaqstandyqtardyń bolashaqqa degen senimin arttyrady.
Oblys ákimi jańa oqý jylynan bastap mektepterge «Ólketaný» (Týǵan ólke tarıhy) degen jańa pán engizilip otyrǵanyn aıtty. Bul - tárbıe men jas urpaqty damytý jolyndaǵy mańyzdy qadam. Elbasynyń "Rýhanı jańǵyrý" baǵdarlamasy qoǵamnyń barlyq salalaryn qamtıdy. Eń aldymen óskeleń urpaqtyń boıynda týǵan jerine, shyqqan tegine degen qurmetti qalyptastyrady.
- Qurmetti ustazdar, oqýshylardyń bilim deńgeıi sizderge baılanysty. Sizderdiń qamqorlyqtaryńyz, bilimderińiz shákirtterińizdiń bıik belesterdi baǵyndyrýlaryna jol ashady. Ótken oqý jylynda 71 oqýshy túrli óner, bilim jarystarynda júldeger atandy. 20 atyraýlyq oqýshy halyqaralyq baıqaýlarda júldeli oryndardy aldy, - dep atap ótti Nurlan Noǵaev. – Zaman talabyna saı jańa tehnologıalardy damytýǵa jáne olardy balalardyń meńgerýine kóńil bólip kelemiz. IT-synyptar ashylyp jatyr, oqý oryndarynyń 90% astamy keń jolaqty ınternet júıesine qosylǵan. Jańa oqý jylynan bastap mektepterde 45 robot tehnıka synyptary jumys isteıdi. Bul jumystar jalǵasyp jatyr. Eger biz tabysty, básekege qabiletti bolǵymyz kelse, balalarymyzǵa qoljetimdi kásibı bilim berýge tıispiz.
1 qyrkúıekte oblys boıynsha jańadan eki mektep, úsh balabaqsha, mýzykalyq kolejdiń jataqhana ǵımaraty paıdalanýǵa berildi. Jyl sońyna deıin bilim berý salasynda taǵy da jańa nysandar ashylady. Bul memlekettiń bilim berý salasyn damytý úshin qajet jaǵdaıdyń barlyǵymen qamtamasyz etip otyrǵanynyń kórinisi, - dep atap ótti aımaq basshysy. -Barlyq oqýshylarǵa ata-analarynyń, ustazdary men tálimgerleriniń úmitterin aqtasyn degen tilek aıtamyn. Eldiń bolashaǵy - sizderdiń qoldaryńyzda. Qazaqstannyń damýy men gúldenýi- sizderdiń qoldaryńyzda. Qutty qadam bolsyn!
Merekelik sharadan keıin oblys ákimi birinshi synyp oqýshylarymen birge
«Meniń Otanym - Qazaqstan» taqyrybyndaǵy alǵashqy sabaqqa qatysty.
Oqý jylynyń alǵashqy kúninen bastap birinshi synyp oqýshylary Qazaqstan tarıhy, elimizdegi belgili tulǵalar jaıly tanymdyq málimetter aldy.
