QTQJB qorjynyndaǵy «nashar kredıtter» nebári 0,89% bolyp shyqty. Bul málimet Moody’s halyqaralyq reıtıń agenttiginiń resmı baspasóz habarlamasynda jarıalanyp otyr. Agenttik sarapshylary Qazaqstannyń turǵyn úı qurylys jınaq banki júıesin «biregeı» dep te baǵalapty. Moody’s taratqan aqparatqa qaraǵanda, Qazaqstannyń turǵyn úı qurylys jınaq banki barlyq kórsetkishter boıynsha turaqty ósim kórsetip keledi. Jipke tizip aıtsaq, bul – qarjylyq kórsetkishter, halyqtyń senimi, klıentterge qyzmet kórsetý sapasynyń jaqsarýy jáne aktıvteriniń salaýatty sapasy. QTQJB básekelesteriniń – ekinshi deńgeıli bankterdiń deniniń sharýasy áli shatqaıaqtap turǵany málim. Munyń negizgi sebebi – problemalyq zaemdardyń kóptigi. Sonyń ishinde ıpotekalyq kredıtter de bar. Keıbir bankterdegi problemalyq kredıtter 30 paıyzdan da asyp jyǵylǵan. Sarapshylar mundaı jaǵdaıdyń týyndaýyn ár qıly túsindiredi. Keıbiriniń pikirinshe, ıpotekanyń  mólsherlemeleri tym joǵary. Bul kóbine klıentterdiń qaryzyn tóleı almaı qalýyna ákep soǵady. Buǵan bankterdi kinálaýǵa bolmaıdy. Sarapshylardyń sózderine sensek, qarjy ınstıtýttarynyń ózi  qazir 8-10 paıyz kóleminde qymbat zaem alýǵa májbúr. - Bankter munyń ústine óziniń marjasy men zaemshynyń kredıtti qaıtarmaý táýekelin de qosady. Árıne, onysy Batystaǵydan birneshe ese kóp. Osylaısha, qaıta-qaıta tuıyqqa tirele beremiz. Óıtkeni, kredıttiń qaıtpaýyna túrtki bolyp otyrǵan jaıt – dál osy joǵarǵy mólsherleme, – deıdi Makroekonomıkalyq zertteýler ortalyǵynyń dırektory Oljas Qudaıbergenov. Bireýler jyldar boıy qordalanyp jatqan máselelerdiń túıinin sheshýmen áýre bolyp júrse, endi bireýlerdiń tasy órge domalap, damý ústinde. Sonyń ishinde, aıtalyq, QTQJB da bar. Olar tabysynyń syryn op-ońaı túsindirip te beredi. – Bizdiń kredıtterimizdiń tartymdylyǵy – barlyq zaemdardyń teńgemen beriletindiginde. Sol sebepti de, valútalyq táýekel klıentterimizdi aınalyp ótedi, – deıdi QTQJB basqarma tóraǵasy Aıbatyr Jumaǵulov. – Biz zaemshylarymyzǵa valúta naryǵyndaǵy tolqýlarǵa qaramastan, zaemdy óteý kezeńinde tólemniń birqalypty, naqty belgilengen mólsherine kepildik beremiz. Bul jalpy naryqta halyqtyń uzaq merzimdi salymdaryn tartýdy  40 paıyzǵa deıin arttyrýǵa múmkindik berdi. Ekinshi deńgeıli bankterge bizben básekege  túsý ońaıǵa soqpaıdy. Moody’s sarapshylarynyń pikirinshe, reıtıńiniń satylap joǵary kóterilýiniń taǵy bir sebebi – QTQJB-nyń udaıy damýǵa umtylýy. Eýropalyq jáne halyqaralyq qurylys jınaq kasalary qaýymdastyǵyna kirip, halyqaralyq deńgeıge shyqqanyna da asa kóp ýaqyt bolǵan joq. - 2014 jyly biz aldymyzǵa zor mindet qoıdyq. Ol – Qazaqstannyń bank sektorynda kóshbasshysy bolý. Baspanaǵa zárý halyqty qoljetimdi zaemdarmen qamtamasyz etetin Banktiń áleýmettik rólin saqtap, ony nyǵaıta túsýdi kózdedik. Jáne bul baǵytta josparly túrde jumys júrgizip kelemiz, – deıdi Turǵyn úı qurylys jınaq bankiniń basqarma tóraǵasynyń orynbasary Erbol Qarashúkeev. Esterińizge sala ketsek, byltyrǵy jyldyń aıaǵyna taman Moody’s investors service halyqaralyq reıtıń agenttigi «Qazaqstannyń turǵyn úı qurylys jınaq banki» AQ-nyń ulttyq valútadaǵy uzaq merzimdi depozıt reıtıńin «turaqty» boljamymen Vaa3-ke deıin kótergen bolatyn. Bul eń aldymen klıent bazasynyń nyǵaıýyna, kapıtal qorynyń joǵarylyǵyna, aktıvteriniń salaýatty sapasyna jáne ótimdilik «jastyǵynyń» jetkiliktiligine baılanysty. Osy jaıttardyń arqasynda bank óz básekelesterinen oq boıy ozyq tur.