Ózbekstannyń Qashqadarıa oblysy Kasan aýdany ákimi Bahtıar Radjabov jergilikti kásipker Fazılat Normýradovany prezıdenttiń kóshpeli qabyldaýyna shaǵymdanǵany úshin halyq aldynda soqqyǵa jyqqan. Kásipkerdiń sózinshe, bastapqyda Radjabov ony balaǵattaǵan, keıin qylqyndyryp, aıaǵymen tepken dep jazady Qamshy.kz aqparat agenttigi centralasian.org saıtynyń deregin negizge alyp.
Qasan aýdany bazarynda saýda jasaıtyn 49 jastaǵy Fazılat Normýradova 11 qyrkúıekte aýdan basshysy Bahtıar Radjabov ózin soqqyǵa jyqty deıdi. Sol kúni aýdanǵa prezıdent ákimshiliginiń ókilderi barǵan. Solardyń aldynda kásipker jer ýchaskesine qatysty shaǵym aıtqan.
"Men halyqtyq qabyldaýǵa kelgen kezde, aýdan basshysy Bahtıar Radjabov óziniń jumys bólmesinde otyrǵan. Kire beriste men ony kórip qaldym da, "Meniń sharýam sheshilip jatyr ma, ákimshilik ókilderi keldi ma?" dep suradym. Ol maǵan "Sen aryzqoısyń, prezıdent portalyna únemi hat jazasyń" dedi. Men portaldyń prezıdent bastamasymen qurylǵanyn aıttym", – deıdi Fazılat Normýradova.
Onyń aıtýynsha, keıin áńgime dalada jalǵasqan. Ol máselesin taǵy suraǵan. Ákim ony balaǵattaı bastaǵan. "Men de onyń balaǵatyna jaýap berdim. Ol sol kezde maǵan júgirip kelip, moınymnan qylqyndyra bastady. Bir qolymen tunshyqtyryp, bir qolymen urdy. Syrt jaqtan adamdar kelip, ajyratyp aldy. Sosyn ol aıaǵymen meni tepti. Men arqammen betonǵa qulap tústim",- dedi Fazılat Normýradova.
Áıel keıin kózin aýrýhanada ashqanyn, mıy qatty shaıqalǵanyn aıtady.
Kasan aýdany ákimi Bahtıar Radjabov telefon arqyly suqbatta kásipker áıeldi urǵanyn joqqa shyǵardy. "Bul áńgime qaıdan shyqty? Men áıeldi uryppyn ba? Meniń odan basqa isim joq pa eken? Biz jaǵdaı jaqsarý úshin, kúni-túni jumys istep jatyrmyz. Men mazalamańdar", - dep málimdedi sheneýnik.
Ózbekstan Bas prokýratýrasy F. Normýradovanyń ótinishi boıynsha, tergeýge deıingi tekserý jumystary júrip jatyr dep málimdedi. Osyǵan deıin Kasan aýdany basshysy Bahtıar Radjabov qaramaǵyndaǵy qyzmetkerlerdi uryp-soǵady degen shaǵymdar túsken.
