«Atameken» UKP «Bıznesti qutqarý qyzmeti» pılotty jobasyn iske qosty. Endi shaǵyn bıznes ókilderi úshin konsýltasıa alatyn jáne zańsyz tekserýdi toqtatatyn 1432 baılanys ortalyǵy quryldy, dep habarlaıdy elorda ákimdiginiń resmı saıty.

«Bıznesti qutqarý qyzmeti» túrli saladaǵy kásipkerler úshin jumys isteıdi, ıaǵnı qoǵamdyq tamaqtaný orny (restoran, bar, kafe), qyzmet kórsetý salasy (sán salony, týragentter, kıim jóndeý jáne tigý jáne basqa), servıs (tamaqty jetkizip berý), saýda, sondaı-aq jóndeý jáne montaj jumystaryn júzege asyratyn bıznesmenderge arnalǵan.

Joba Astanada pılotty rejımde iske asyrylyp jatyr jáne elordadaǵy shaǵyn jáne mıkro-bıznesti shuǵyl túrde tıimdi qoldaýǵa baǵyttalǵan. 1432 nomeri boıynsha astana kásipkerlerine ózekti jáne jedel keńes usynylady, al «Qutqarý qyzmeti» mobıldik toby sol aıtylǵan jerge shuǵyl túrde barady. Eeger joba qoldanystan sátti ótse respýblıka boıynsha engiziletin bolady.

«Atameken» UKP qoǵammen baılanys jónindegi departamenti habarlaǵandaı, «Bıznesti qutqarý qyzmeti» kelesidegideı prınsıppen jumys jasaıdy: «Eger Astana kásipkerine baqylaýshy organnan, salyqtan nemese kóshi-qon qyzmetinen, polısıadan zańsyz tekserýge kelse bolmasa esepshotty arestke alsa, bıznes obektini komýnıkasıadan óshirse – sizge shuǵyl túrde kómek kórsetiledi». Mobıldi toptyń quramyna «Atameken» UKP, prokýratýra, jemqorlyqqa qarsy organdar, Astana İİD jáne TJD qyzmetkerleri kiredi.