Memleket basshysynyń tapsyrmasyn oryndaý maqsatynda, ákimdikpen Astana qalasynyń 2019-2023 jyldarǵa arnalǵan jınaqy qurylysy jónindegi keshendi jospardyń jobasy ázirlenip, Úkimet otyrysynyń qaraýyna usynylyp otyr. Joba múddeli memlekettik organdarmen kelisilgen.
Kóliktendirý deńgeıiniń 8-9 prosentke deıin jyl saıynǵy ulǵaıýyn eskere otyryp, 2023 jylǵa deıin 121 km jol, 2 jol aıryǵyn, 3 kópir, 1 jol ótpesin, 1 tonnel salý jáne 1 aınalma joldy aıaqtaý josparlanýda.
Kólik qańqasyn qurý elorda joldarynda kóliktik kollapstyń týyndaýyna jol bermeýdi jáne qalanyń negizgi magıstraldarynan 50 prosentke júktemeni tómendetýge múmkindik beredi.
Naqty sheshimdi qajetsinetin Astananyń ózekti máseleleriniń biri - nóserli káriz.
2019 jyldyń sońyna qaraı nóserli kárizdiń qolda bar tazalaý qurylystaryn rekonstrýksıalaý jáne jańalaryn salý jumystaryn ótkizý josparlanady. Bul 17 myń gektar aýdandy qamtýǵa (Jastar shaǵyn aýdany, Aqbulaq, Óndiris turǵyn alaptary, Sh. Qudaıberdiuly dańǵyly aýdany, Myńjyldyq aleıasy, «Nurly jol» temir jol vokzaly, Áskerı qalashyq) jáne jer ústindegi sýlardyń kedergisiz ketýine múmkindik beredi.
Sý jınaýdyń jalpy alańy 13 myń gektardan 23 myń gektarǵa deıin ósedi, bul 2030 jylǵa deıin ıgerý alańynyń 66 prosentke (34,6 myń ga) nemese 2020 jylǵa nóserli káriz jelisine aǵyn sýlar alańnyń 96,5 prosentin (23,8 myń ga) quraıdy.
Halyqqa sapaly qyzmettermen qamtamasyz etý úshin 150 km sýmen qamtý jelilerin jáne 81 km sý burý jelilerin salý kútilýde.
Ekinshi Jylý elektr ortalyǵyn keńeıtý jáne qaıta jańartý qosymsha 2~2,5 mln sharshy metr turǵyn jáne komersıalyq alańdy ortalyqtandyrylǵan jylý júıesimen qamtamasyz etedi.
Úshinshi Jylý elektr ortalyǵynyń birinshi kezegin salý qalanyń batys jáne soltústik bóliginiń jylýmen qamtamasyz etedi. Al qýattylyǵy saǵatyna 418 Gkal úshinshi Jylý elektr ortalyǵynyń ekinshi kezegin salý Memlekettik-jekeshelik áriptestik tetigi arqyly josparlanady.
Sondaı-aq, 110 kV úsh qosalqy stansıasyn salýdy jáne kabeldik jelige qaıta jaılastyrýmen 110 kV aýa jelilerin qaıta jańartýdy kózdeıdi. Bul LRT, Myńjyldyq aleıasy, Jeleznodorojnyı kentin elektrmen qamtýǵa, qalanyń ońtústik-batys bóliginde júktemeni tómendetýge múmkindik beredi.
Gazdandyrý boıynsha birinshi kezeńde 2021 jylǵa qaraı Jylý elektr ortalyqtaryndaǵy sý jylytqysh jáne shaǵyn jeke qazandyqtardy, sondaı-aq turǵyn-úı alqaptaryn (Kóktal, Ońtústik-SHyǵys, Shubar, Family Village, Garden Village, Óndiris, Agroqalashyq, Jeleznodorojnyı, Prıgorodnyı, Telman turǵyn alaptary) gaz otynyna aýystyrý josparlanady. Bul zıandy zattar shyǵaryndylaryn 30 prosentke tómendetýge múmkindik beredi.
Elbasynyń tapsyrmasyn oryndaý maqsatynda Esil ózeniniń arnasyn ári qaraı rekonstrýksıalaý jumysyn kúsheıtý josparlanady (12 ýchaskeler).
Budan basqa, turǵyndardyń ómir súrý sapasyn arttyrý maqsatynda, qalanyń kez-kelgen turǵyn aýdanynan 20 mınýttyq qadamdyq qoljetimdilikti qamtamassyz etetin saıabaqtar men gúlzarlar salý josparlanady.
Baqyt Sultanov aldaǵy 5 jylda Astana budan da kórkeıip, gúldene túsedi deıdi. Onyń aıtýynsha, 2023 jylǵa qaraı 10 mln sharshy metr turǵyn úı salynady. Sondaı-aq 37 mektep pen 6 balabaqsha jáne 15 densaýlyq nysanyn salý kózdelgen. Budan basqa qalanyń kez kelgen aýdanynda turǵyn úıden 20 mınýttyq jerde saıabaqtar men gúlzarlar salý da jospary bar. Aıta keteıik, bul keshendi jospardy ázirleý Elbasy tapsyrmasy.
