Aqtóbe oblysy «7-20-25» baǵdarlamasynyń aıasynda «Jas arman» jáne «Qamqor baspana» ónimderine qosyldy. Búgin Aqtóbe oblysynyń ákimi Berdibek Saparbaev pen «Baspana» Ipotekalyq uıymynyń basshysy Qaırat Altynbekov tıisti memorandýmǵa qol qoıdy.

Elimizdegi «7-20-25» baǵdarlamasy aıasynda Aqtóbe oblysynyń ákimdigi men «Baspana» ıpotekalyq uıymy memorandýmǵa qol qoıdy. Endi alqashqy jarna retinde baspana qunynyń 10 paıyzy jetkilikti.

Osylaısha, jas otbasylar men Aqtóbe oblysynyń búdjettik sala qyzmetkerleri «7-20-25» baǵdarlamasy boıynsha páter qunynyń 10 paıyzyn ǵana tólep, úı alý múmkindigine ıe bolady.

Memorandýmǵa sáıkes, Aqtóbe oblysynyń ákimdigi atalǵan azamattarǵa bastapqy jarnanyń jartysyn tóleýdi óz moınyna alady jáne osy maqsatqa 2 mlrd teńge bóledi.

«Aqtóbe oblysynyń ákimi men «Nur Otan» partıasyna bastapqy jarnany azaıtý boıynsha áleýmettik bastamalardy qoldaǵany úshin alǵysymdy bildirgim keledi. Oblys qarqyndy damyp keledi jáne «7-20-25» baǵdarlamasyna qatysýshylardyń sany boıynsha kóshbasshylardyń biri. Qazirgi ýaqytta biz «Nur Otan» partıasymen birlese otyryp, elimizdiń basqa óńirlerinde de osy bastamalardy júzege asyrý boıynsha jumystar júrgizip jatyrmyz», - dedi «Baspana» Ipotekalyq uıymynyń basshysy Qaırat Altynbekov.

Aqtóbege kelgen partıanyń hatshysy Tamara Dúısenova búgin bes áleýmettik bastama aıasynda atqarylyp jatqan jumyspen tanysty. Ári «Baspana» ıpotekalyq kompanıasy men oblys ákimdigi memorandýmǵa qol qoıdy. Bul Aqtóbede quny 2 mıllıard teńge bolatyn qosymsha turǵyn úı paıdalanýǵa beriledi degen sóz.

«Bul bizdiń halyq úshin úlken kómek. Negizinen bul baǵdarlama boıynsha kópbalaly, ata-ananyń qamqorlyǵynsyz qalǵan jáne áleýmettik jaǵdaıy nashar otbasyǵa kómek beriledi. Olardyń qatarynda memlekettik qyzmetkerler de bar»,- dedi oblys ákimi Berdibek Saparbaev.

Aıta keteıik, Ulttyq bankke Qazaqstan boıynsha 26 mıllıard teńgeniń ótinishi tústi. Onyń 18 mıllıard teńge bolatyn nesıesi maquldandy.

«7-20-25» baǵdarlamasy boıynsha Ulttyq bank jáne ekinshi deńgeıli bank fılıaldarymen jumys atqarylyp jatyr. Óńirde osy baǵdarlama negizinde 24 myńǵa jýyq azamat páter alýǵa nıet bildirdi. Qazirgi kezde 1,6 mıllıard teńgeniń aryzy qabyldanyp, quny 730 mıllıon teńge bolatyn 88 aryz qanaǵattandyryldy»,- dedi oblys ákimi Berdibek Saparbaev. 

Esterińizge sala keteıik, Aqtóbe «7-20-25» baǵdarlamasy boıynsha bastapqy jarnasy azaıǵan ekinshi aımaq bolyp otyr. Buǵan deıin Shymkent qalasynda «Jas Arman» jáne «Qamqor Baspana» ónimderi pılot retinde iske qosylǵan edi.