QR Investısıalar jáne damý mınıstri Jeńis Qasymbektiń aıtýynsha, «Baspana» ıpotekalyq uıymy nesıelik turǵyn úı qurylysyna 150 mlrd. teńge somasynda óz úlesin qosýǵa nıetti.
Eger kompanıa osyndaı sheshim qabyldasa, aıtarlyqtaı soma nesıelik baspana qurylysy naryǵynda aınalymda bolady.
7-20-25-ke qatysýshylar sany boıynsha Almaty, Astana qalalary, sonymen qatar Mańǵystaý oblysy kósh bastap keledi. Aqtóbe, Shyǵys Qazaqstan jáne Aqmola oblystarynda nesıe berý qarqyny ósýde.
Bastapqy turǵyn úı boıynsha usynystardy ulǵaıtý maqsatynda «Baspana» ıpotekalyq uıymy 7-20-25 boıynsha turǵyn úı qurylysy úshin jergilikti atqarýshy organdarǵa 150 mlrd teńge bólý múmkindigin qarastyrýda.
JAO – men birge jas otbasylar jáne búdjettik sala qyzmetkerleri úshin 7-20-25 sheńberinde bastapqy jarnany qysqartý boıynsha jumys bastaldy. Baspanamen «Jas arman» jáne «Qamqor baspana» ónimderi ázirlendi. JAO–men joǵaryda atalǵan sanattaǵy azamattarǵa bastapqy jarnany qysqartý úshin sýbsıdıa beriledi dep boljanýda. Sonymen qatar, tizimderdi jasaý, ónimge qatysý úshin azamattardy irikteýdi ákimdikter ózderi júrgizedi. Joba boıynsha Shymkent ákimdigi 2 myńǵa jýyq turǵynǵa qoldaý kórsetý úshin 2 mlrd. teńge sýbsıdıa bóledi. Sondaı-aq, Ulttyq Banktiń qaýlysymen Shymkent qalasy úshin turǵyn úıdiń eń joǵarǵy qunynyń mólsheri 25 mln. teńgege deıin ulǵaıtyldy.
7-20-25-ke 11 qyrkúıekten bastap Qazaqstan Halyq Banki jáne ForteBank qosyldy. Osylaısha, ótinimderdi 7 bank-seriktes qabyldaıdy: Sentrkredıt banki, ATFBank, Sesnabank, BankRBK, Evrazıalyq bank, Halyq banki jáne ForteBank.
«Búginde baspana qurylysynda revolverlik turǵyda, ıaǵnı nesıelik turǵyn úıge árbir eki jylda 270 mlrd teńge aınalyp turady. Endi osy baǵdarlamaǵa Ulttyq bankpen qurylǵan «Baspana» uıymy óz úlesin qosýǵa nıetti. Atap aıtqanda, osy ıpotekalyq uıymy nesıelik turǵyn úı qurylysy maqsatynda óńirlerge qosymsha 100-150 mlrd teńge bólý bastamasyn kóterdi. Sońǵy sheshimdi kompanıa qashan qabyldaıtyndyǵy týraly málimet mende joq. Alaıda buǵan deıin osyndaı usynys jasalǵan edi», - dep toqtaldy mınıstr.
J. Qasymbektiń sózine qaraǵanda, eger de osyndaı sheshim qabyldansa, onda aıtarlyqtaı qomaqty soma revolverlik negizde turaqty túrde nesıelik baspana qurylysy naryǵynda aınalymda bolady.
Ekinshi turǵyn úı naryǵy obektilerin ıpotekalyq nesıelendirý maqsatynda Baspana «Baspana Hıt» jańa ónimin iske qosady. Bastapqy jarna - 20% quraıdy, jyldyq mólsherlemesi – Ulttyq Banktiń bazalyq mólsherlemesi + 1,75%. Nesıe merzimi 15 jylǵa deıin. Qazirgi ýaqytta Ulttyq Banktiń bazalyq mólsherlemesi 9% quraıtynyn eskere otyryp, «Baspana Hıt» óniminiń jyldyq baǵamy 10,75% kólemine eseptelgen.
