Qazaqstandyq jáne sheteldik BAQ ókilderi aldynda sóılegen sózinde Memleket basshysy Serbıa Respýblıkasynyń Prezıdentine Qazaqstanǵa alǵash ret resmı saparmen kelgeni úshin rızashylyq bildirip, eki el arasyndaǵy yntymaqtastyqtyń damý qarqynyn erekshe atap ótti, dep habarlaıdy Qamshy.kz aqparat agenttigi Aqordaǵa silteme jasap.

Nursultan Nazarbaev búgingi ótken kelissózder nátıjesinde qol jetkizilgen kelisimderge toqtaldy.

– Bizdiń joǵary deńgeıdegi kezdesýlerimiz taraptardyń ózara baılanystardy damytýǵa múddeli ekendigin bildiredi. Eń aldymen, bul – saýda-ekonomıka salasyndaǵy kooperasıany odan ári ilgeriletý. Elderimizdiń ekonomıkasy birin-biri tolyqtyryp turady. Jetkiziletin ónimder túrlerin keńeıtýge daıynbyz, – dedi Qazaqstan Prezıdenti.

Memleket basshysy Qazaqstan men Serbıa arasyndaǵy qatynastardy odan ári ilgeriletetin basym baǵyttardy da atady.

– Biz Saýda-ekonomıkalyq yntymaqtastyq jónindegi úkimetaralyq komısıa aldyna jańa mindetter qoıdyq. Jaqynda bul komısıanyń ekinshi otyrysy ótti. Onda basym baǵyttar aıqyndaldy. Olar – aýyl sharýashylyǵy, ónerkásip, qurylys, kólik, energetıka jáne basqa da salalar. Biz Azıa men Eýropa arasynda júk tasymalyn jedeldetý úshin tıisti ınfraqurylym qalyptastyrýǵa múddelimiz, – dedi Memleket basshysy.

Qazaqstan Prezıdenti qazirgi ýaqytta Eýrazıalyq ekonomıkalyq odaq pen Serbıa arasyndaǵy erkin saýda aımaǵyn qurý úshin saraptamalyq kelissózder jalǵasyp jatqanyn atap ótti.

Sondaı-aq, Memleket basshysy kelissózder barysynda óńirlik jáne halyqaralyq saıasat máseleleri talqylanǵanyn aıtty.

Sońynda Memleket basshysy Álemdik jáne dástúrli dinder kóshbasshylarynyń VI sezine qatysýǵa shaqyrýyn qabyl alǵany úshin Serbıa Respýblıkasynyń Prezıdentine rızashylyq bildirdi.

Aleksandr Výchıch qonaqjaılyq kórsetkeni úshin Nursultan Nazarbaevqa alǵys aıtyp, kelissózderdiń jemisti bolǵanyn atap ótti.

– Menińshe, Ortalyq Azıada Astana sıaqty qarqyndy ózgerip ári órkendep kele jatqan qala joq. Prezıdent Nazarbaevtyń jáne onyń kóregendiginiń, kúsh-jigeri men iske berilgendiginiń arqasynda Qazaqstannyń qol jetkizgen jetistikteri meni tań qaldyrady. Sizderdiń «Qazaqstan-2050» strategıasynda belgilegen maqsattaryńyzǵa jetetinderińizge kámil senemin, – dedi A.Výchıch.

Serbıa Respýblıkasynyń Prezıdenti eki el arasyndaǵy saýda-ekonomıkalyq yntymaqtastyqtyń mańyzdylyǵyn aıtyp, ony ári qaraı kúsheıtý úshin zor áleýettiń bar ekenin atap ótti.

Sonymen qatar, Serbıa Respýblıkasynyń Prezıdenti eki memlekettiń halyqaralyq deńgeıde bir-birine ózara qoldaý kórsetýin nyǵaıtý qajettiligine toqtaldy.