Búgin «Nur Otan» partıasynyń Ortalyq apparatynda partıa Tóraǵasynyń Birinshi orynbasary Máýlen Áshimbaev Qazaqstan Jazýshylar odaǵynyń múshelerimen jáne elimizdiń zıaly qaýym ókilderimen kezdesti. Sonyń nátıjesinde partıa men Jazýshylar odaǵy arasyndaǵy ózara yntymaqtastyq týraly memorandýmǵa qol qoıyldy.

Jalpy Memleket basshysynyń tapsyrmasymen «Nur Otan» partıasy qashanda zıaly qaýymǵa, aqyn-jazýshylarǵa, mádenıet pen óner salasynda ter tógip júrgen barsha azamattarǵa qoldaý kórsetip keledi. Jıynda osy jumystardyń aldaǵy ýaqytta da óz jalǵasyn tabatyny aıtyldy. Sol sebepti atalǵan memorandým aıasynda aldaǵy jumystyń basym baǵyttary aıqyndaldy. Bul rette partıa aqyn-jazýshylardy qoldaý maqsatynda tórt birdeı joba usynyp otyrǵanyn atap ótken jón.

Iaǵnı partıa jas aqyn-jazýshylarymyzdy qoldaý, olardy yntalandyrý maqsatynda «Rýhanı jańǵyrý» baǵdarlamasy aıasynda arnaıy baıqaý ótkizýdi usynyp otyr. Sol arqyly atalǵan baǵdarlamanyń máni men mańyzyn jáne onyń qundylyqtaryn keńinen dáripteý jáne jas aqyn-jazýshylarǵa júıeli túrde qoldaý kórsetý kózdelgen. Ekinshi joba – «Rýhanı jańǵyrý» baǵdarlamasyn iske asyrý aıasynda Jazýshylar Odaǵymen birlesip «Astana» telearnasynan kórsetiletin arnaıy telebaǵdarlama daıyndaý. Úshinshi joba – qazirgi zamanǵy tehnologıalardyń kómegimen YouTube-te arnaıy kanal ashyp, rýhanı jańǵyrýdyń qundylyqtaryn nasıhattaıtyn, ıdeologıalyq, tárbıelik, aǵartýshylyq mańyzǵa ıe, ulttyq kodty saqtap, bilimge degen qushtarlyqty arttyrýǵa úles qosatyn bastamalardy júzege asyrý. Tórtinshi joba partıalyq bastamalar aıasynda jańǵyrtylǵan elimizdegi kitaphanalarda aqyn-jazýshylarmen kezdesýler, túrli shyǵarmashylyq keshter ótkizetin arnaıy klýbtar qurý.

– Bul jobalardyń barlyǵyn jas aqyn-jazýshylarymyzǵa berilip otyrǵan mol múmkindik dep esepteımiz. Sondyqtan osy múmkindikti tıimdi paıdalanyp, alǵa qoıǵan maqsattarymyzǵa jetý úshin birlesip jumys isteıik, – dedi Máýlen Áshimbaev.

İs-sharaǵa Jazýshylar odaǵynyń tóraǵasy Ulyqbek Esdáýlet, «Mıras» respýblıkalyq keńesiniń tóraǵasy, Májilis depýtaty Bekbolat Tileýhan, dramatýrg, jazýshy Tólen Ábdik, jazýshy Aldan Smaıyl, Májilis depýtaty Saýytbek Ábdirahmanov, aqyn Baýyrjan Qaraǵyzuly jáne basqa da qalamgerler qatysyp, kóterilgen máseleler boıynsha óz oılarymen bólisti.

Sonymen qatar jıyn barysynda Elbasynyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýynda kórsetilgen mindetterdiń mańyzy keńinen talqylanyp, halyqqa túsindirý jumystaryn birlesip atqarý jaıy da sóz boldy.