Búgin Almaty qalasynda TMD memleketteri jastarynyń forýmy óz jumysyn bastady.
Forýmǵa Ázerbaıjan, Reseı, Belarýs, Qyrǵyzstan, Ózbekstan jáne Qazaqstannyń jastar uıymdarynyń, memlekettik organdardyń ókilderi, jas kásipkerler men volonterlar qatysýda.
Forýmnyń resmı ashylý saltanatynda TMD elderinen kelgen delegasıa jetekshileri sóz sóıledi. Atap aıtqanda, Jastar isi jónindegi federaldyq agenttiktiń halyqaralyq qyzmet bóliminiń bastyǵy (Rosmolodej) D. Ivanov, Qyrǵyz Respýblıkasy Úkimeti janyndaǵy Jastar isi, dene shynyqtyrý jáne sport jónindegi memlekettik agenttiginiń jastar saıasaty bóliminiń bas mamany A. Adamalıev, Belarýs Respýblıkasy Bilim mınıstrliginiń «Balalar men jastardyń kórkem shyǵarmashylyǵy ulttyq ortalyǵy» Respýblıkalyq jastar bilim berý ortalyǵy mekemesiniń meńgerýshisi D. Týronok, Ázirbaıjan Jastar uıymdary Ulttyq Keńesiniń tóraıymy M. Medjıdova, Ózbekstannyń Búkilálemdik jastar qaýymdastyǵynyń tóraǵasy M. Álimbaev, «Masıs» «Qazaqstandyq armán qoǵamy» respýblıkalyq qoǵamdyq birlestigi tóraǵasynyń orynbasary A. Navasardán sóz sóıledi.
Jastar isi jónindegi federaldyq agenttiktiń (Rosmolodej) halyqaralyq qyzmet bóliminiń basshysy Dmıtrıı Ivanov óz sózinde Reseı Federasıasy úshin TMD keńistigindegi ózara yqpaldastyqta jastar arasyndaǵy ózara is-qımyldy damytý basym baǵyt bolyp tabylatynyn atap ótti.
«Biz óz tarapymyzdan ár túrli bastamalardy konstrýktıvti túrde qoldaýǵa daıynbyz. Bizde granttyq qoldaýdy júzege asyratyn múmkindikter bar. Forýmǵa qatysýshylardyń alǵan tájirıbeleri bolashaqta óz kórinisin tabady dep úmittenemiz», - dedi D. Ivanov. Reseı delegasıasynyń basshysy usynylǵan jobalardy júzege asyrý úshin Jol kartasyn ázirleýdi usyndy.
Ázirbaıjan jastar uıymdarynyń Ulttyq keńesiniń tóraıymy M. Medjıdova jastar kásipkerligi men eriktilik qyzmetti damytý, sondaı-aq jastar uıymdary men jobalarynyń ózektiligin atady.
Sondaı-aq, forým aıasynda «Zamanaýı týrızmniń trendteri», «Volonterlik ómir salty beınesi», «Jastar jáne bıznes», «Aqparat aǵymyndaǵy jastar» taqyryptarynda suhbat alańdary ótti.
Forým qorytyndysy boıynsha qatysýshylardyń usynystary negizinde tıisti usynymdar qabyldanady.
