«Atameken» jáne ANQ Azıalyq sapa jelisi Yntymaqtastyq týraly kelisimge qol qoıdy.
Almatyda XVI Azıalyq Sapa Kongresi ótip jatyr. İs-shara aıasynda «Atameken» QR Ulttyq kásipkerler palatasy jáne Azıalyq sapa jelisi AsianNetworkforQuality nemese ANQ) arasynda Yntymaqtastyq jáne birlesken qyzmet týraly kelisimge qol qoıyldy.
XVI Azıalyq Sapa Kongresti «Atameken» QR Ulttyq kásipkerler palatasy, Azıalyq sapa jelisi men Qazaqstandyq sapa jáne ınovasıalyq menedjment uıymy uıymdastyrdy.
«Búgingi ahýal álemniń ekonomıkalyq damyǵan elderiniń úzdik tájirıbesi ómirdiń túrli salalarynda sapa kategorıasyn anyqtaýǵa qatysty ádettegi stereotıpterdi ózgertýdi talap etedi. Sapa fılosofıasy, onyń kóterilýin qamtamasyz etý árbir qazaqstandyq kompanıanyń korporatıvtik mádenıetiniń ajyramas bóligi bolýǵa kómektesý – Kongrestiń negizgi mindetteriniń biri, al sapany jaqsartý salasynda úzdik álemdik praktıkalar ár otandyq kásipker arsenalyna kirýi qajet», – dedi «Atameken» QR UKP Basqarma Tóraǵasynyń orynbasary Eldos Ramazanov.
İs-sharaǵa Azıa, AQSH, Eýroodaqtyń 20 memleketinen 200-den astam ókil qatysyp jatyr. Kongres baǵdarlamasyna Japonıa, Shveısarıa, AQSH, Ońtústik Koreıa jáne basqa elderden sapa menedjmenti salasyndaǵy jetekshi spıkerlerdiń sóılegen sózderi men semınarlary kirgen.
Kogress aıasynda ANQ Basqarma Tóraǵasy Azat Abrahmanov, «Atameken» QR UKP Basqarma Tóraǵasynyń orynbasary Eldos Ramazanov jáne ANQ qurmetti prezıdenti Norıakı Kano Yntymaqtastyq týraly úshjaqty kelisimge qol qoıdy.
Qujatqa sáıkes, ANQ Azıalyq sapa jelisi «Atameken» QR Ulttyq kásipkerler palatasyna qazaqstandyq kásipkerler úshin menedjment júıesi salasyndaǵy sońǵy jetistikterdi engizý maqsatynda kómek kórsetýge, bıznesmenderdi halyqaralyq sheberlik sabaqtar, konferensıalar men forýmdarǵa qatysýǵa shaqyrýǵa, eksporttyq áleýetti arttyrý úshin túrli shet memleketterdiń kásiporyndarymen jáne uıymdarymen sapa menedjmenti salasyndaǵy yntymaqtastyqty jandandyrýǵa mindettenedi.
Kelisim aıasynda «Atameken» QR UKP ókilderiniń ANQ múshe memleketterinde kásipkerler quqyǵyn qorǵaý men alǵa jyljytý boıynsha jobalardy bekitý, usynystar engizý boıynsha jıyndar men jumys toptaryna qatysýy josparlanǵan.
Buǵan qosa ónim sapasyn jaqsartýǵa baǵyttalǵan ınovasıalardy qoldana otyryp, kásiporyndardy basqarýda aldyńǵy qatarly bilim men tájirıbe almasý maqsatynda «Benchmarkıng týryn» ótkizý josparlanyp otyr. Taraptar kásipkerlerge óz jetistikterin eń jaqsy azıalyq kásiporyndarmen salystyrýǵa kómektesedi. Taraptardyń yntymaqtastyǵy qyzmetkerlerdiń biliktiligin arttyrýda Azıa elderiniń qyzmetkerlerdi sertıfıkattaý salasynda ozyq tájirıbesin qoldanýǵa múmkindik beredi.
Azıalyq sapa jelisi aıasynda sapa menedjmenti salasyndaǵy ozyq azıalyq kompanıalardyń jetistikteri, bıznes basqarýdyń jańa modelderi usynylatyn jyl saıyn kongrester ótedi. Kongrester sheńberinde Azıalyq sapa jelisi uıymdastyrǵan sapa boıynsha halyqaralyq baıqaýlardyń qorytyndysy jasalyp, ónim men qyzmet sapasy, qyzmetkerlerdi basqarý, áleýmettik jaýapkershilik salasyndaǵy kórnekti nátıjelerge qol jetkizgeni úshin mamandar men ǵalymdardy marapattaý saltanaty ótedi. Kásiporyndar men jeke tulǵalardyń marapattary olardyń halyqaralyq deńgeıde tanylǵanyn bildiredi.
Kelesi 17-shi Azıalyq Sapa kongresi ANQ – 2019 Bangkokte (Taıland) ótedi.
