Laık jınaımyn dep maıyp bolǵan, ıa bolmasa selfı  jasaımyn dep jan tapsyrǵandar qatary artyp ketken. Ǵalamdyq zertteý nátıjesi boıynsha sońǵy jyldary ózin-ózi fotoǵa túsirý kezinde kóz jumǵandardyń sany 300-ge jetipti. Atalǵan trendpen kúresý úshin tipti birqatar memleketter arnaıy zań qabyldaýǵa barmaqshy. Bul týraly Eýrazıa birinshi arnasy habarlaıdy. 

Halqynyń sany 300 mıllıonnan asqan AQSH ekstremaldy selfımen kúresti bastap ketti. Atap aıtsaq, záýlim ǵımarattar, taý men tas, ózen men kól jaǵasynda  ádemi kadr úshin basyn báıgege tigetinderge tosqaýyl qoımaq. 

Fotoǵa túsemin dep kóz jumatyndardyń sany bizdiń elde de ósip keledi. Birer jyl buryn Ósmekende jasóspirim selfı jasaımyn dep Ertis ózenine sekirip ketip, kóz jumdy. Aǵystyń qatty bolǵany sonshalyq, onyń denesi bir aıdan soń, 18 shaqyrym jerden bir-aq tabylǵan edi. Mamandar jalpy selfıdi kimderdiń kóp jasaıtynyn aıtty. 

«Ózin-ózi kórsetý jurtqa. Iaǵnı mine men qandaı keremetpin. Selfımen kóbinese kim aınalysady? Ózin-ózi eshqandaı bir, iste ózin-ózi kórsete almaǵan kisiler selfıǵa baǵynyshty bolyp ketedi. Eger, siz keremet maman bolsańyz. Eger, siz keremet maman bolyp, óz isińizde bir jetistikterge jetip jatsańyz, sizdiń ýaqytyńyz bolmaıdy, selfı jasap jurtqa taratyp júrýge» - deıdi psıholog Aıman Nurmaǵanbetova.

Ǵalymdardyń zertteýinshe, kúnine úsh ret sýretke túsken adamǵa «selfıtıs» dıagnozyn qoıýǵa bolady. Al onyń asqynǵan túrine fotosyn áleýmettik jelige salǵysy kelip turatyndar jatady. Sońǵysy  sozylmaly. Buǵan táýligine 6 sýretten artyq foto salatyndar kiredi.  

«Jastardyń bir jaǵynan ol ómiri ǵoı. Bizdiń kezimizde bolǵan joq ondaı. Bolǵanda bizde túsýshi edik».

«Selfı jasaıdy da. Sosyn osyndaı apattarǵa ushyraıdy. Menińshe ol óte qaýipti. Olaı istep kerek emes. Ne sebepti isteıdi ony? Jáı haıp úshin, tanymal bolý úshin isteıdi».

Tildik qoldanysymyzǵa budan 4 jyl buryn ǵana engen «selfıdi» qazir bári biledi. Áý basta qyzyǵýshylyqpen bastalǵan bul ádet, az ýaqyttyń ishinde talaı adamǵa dert bolyp jabysty. "Onyń jetegine ergender, búginde óz sanasyn ózi bıleı almaıtyn kúıge jetken" deıdi mamandar. 

«Laık jınaǵan saıyn, onyń boıyndaǵy baqyt garmony, qýanysh garmony oınaıdy. Odan keıin soǵan táýeldi bolyp qalady. Kez kelgen nársege táýeldilik bul  aýrý! Psıhıkasy buzyla bastaıdy» - deıdi psıholog ǵalıash Mahasheva. 

Laık jınaımyn dep jan tapsyrǵandardyń biri Taldyqorǵan qalasynyń turǵyny. 15 jastaǵy qyz 8 qabattan qulap ketken bolatyn. Boıjetken qurylysy aıaqtalmaǵan qonaq úıdiń ústine shyǵyp, ınstagram jelisinde tikeleı efırge shyqqan eken. Kórermenderimen sóılesip jatqanda aıaǵy taıyp, tómen qulaǵan. Jergilikti jurttyń aıtýynsha, atalǵan jerde osyǵan deıin de qaıǵyly jaǵdaılar tirkelgen eken.

«Ne bul bitpedi, ne salmady buny balalar mine, qazir jasóspirimder neshe túrli sýısıdterge túsip jatyr. Mine keshe ǵana bir qyz selfı jasaımyn dep qulap ketti» - deıdi qala turǵyny Haıyrgúl Qaıymova. 

Laık úshin jan pıda degen árıne sanaǵa syıymsyz dúnıe. Qaýipsiz jerde turyp-aq, sátti kadr jasaýǵa bolady. Eger elimizde fotoǵa túsýdiń sońy ólimmen aıaqtalatyn jaıttar kóbeıse, bálkim ekstremaldy selfıge sheteldegideı zań júzinde tyıym salý jaıynda oılaný kerek shyǵar".