Jaqynda Qostanaı oblysyndaǵy Taran aýdanynyń aty Beıimbet Maılın atyna ózgertildi. Endi aýdan qyzyl ımperıanyń qolshoqpary L.Taran atymen emes, qazaqtyń kórnekti jazýshysy, qazaq ádebıetiniń qazyǵyn qaqqan qalamgerlerdiń biri, aqyn, dramatýrg Beıimbet Maılınniń esimimen atalady.
Osyǵan oraı Almaty kópsalaly kolejinde arnaıy kezdesý ótti. Oǵan jazýshynyń urpaǵy Saltanat Maılına, beıimbettanýshy-ǵalym Jumabek Tabyn, kolej dırektorynyń orynbasary Jańyl Núsipjanova jáne stýdenter qatysty.
Alǵashqy sóz tizgini tıgen Jumabek Tabyn myrza aıtýly oqıǵany Beıimbet Maılınniń 125 jyldyq mereıtoıy qarsańynda jasalyp otyrǵan syı-qurmet dep baǵalady. «30-qyrkúıek – men úshin uly kún. Óıtkeni bizdiń neshe jylǵa sozylǵan eńbegimiz osy kúni jemisin berdi. Qoǵamdyq komısıa músheleri aýdannyń aty Beıimbet Maılınniń esimimen atalýyn bir aýyzdan qoldady. Tipti qalys qalǵan adam joq», – dedi ol.
Jıynda Saltanat Maılına jazýshynyń basqa da urpaqtary týraly áńgimeledi, sondaı-aq ol atasynyń muralaryn nasıhattaý maqsatynda B.Maılın atyndaǵy qor jumys istep jatqanyn aıtty.
Kezdesý qonaqtary bolashaq josparlarymen de bólisti. Olar aldaǵy ýaqytta jazýshynyń shyǵarmasymen attas «Shuǵanyń belgisi» atty eskertkish ornatýdy josparlap júrgenderin jetkizdi. Shuǵa búkilqazaq áıelderiniń sımvoly bolǵany sıaqty, bul eskertkish te búkil qazaq áıelderiniń beınesin ashyp kórsetetin jádiger bolmaq. Eger eskertkish turǵyzylyp jatsa, onyń tómengi aınala dóńes jaqtaýlaryna B.Maılınniń ataqty shyǵarmalarynyń attary jeke-jeke jazylady.
Óz kezeginde stýdentter qonaqtarǵa kókeıtesti saýaldaryn qoıdy. «B.Maılınniń keıipkerleri shynaıy ómirden alynǵan ba?» degen suraqqa Jumabek Tabyn «Iá, Bı-aǵanyń keıipkerleriniń 80 paıyzy shynaıy ómirdegi adamdar. Azamat Azamatych, Kúlpash, Myrqymbaı barlyǵy sol zamannyń tıptik keıipkerleri» dep jaýap berdi. Ol sonymen qatar Beıimbet Maılındi qazaq kınodramatýrgıasynyń negizin qalaýshy dep atady. «Qazaqstan tarıhyndaǵy tuńǵysh fılm – «Amankeldiniń» kınotýyndysynyń senarıin jazý úshin, Torǵaı dalasynda 4-5 aı zertteý júrgizdi. Tipti kınoda Bı-aǵanyń balalary da oınady. Biraq eń qasirettisi Almaty qalasynda «Amankeldi» fılmi kórsetiletin týraly afıshalar jarıalanǵan kúni keshke keńes ókimetiniń janalǵyshtary Beıimbet Maılındi ustap alyp ketedi. Al fılmniń tıtrinen Bı-aǵanyń aty-jóni alynyp tastaldy», – deıdi J.Tabyn.
Kezdesý sońynda qonaqtarǵa 20-ǵasyrdyń basyndaǵy alash zıalylarynyń 400-den asa fotosýretteri toptastyrylǵan «Alashorda» álbomy syıǵa tartyldy.
Aıta keteıik, is-sharany Almaty qalasy İshki saıasat basqarmasynyń «Tarıhtan taǵylym» jobasy aıasynda «Adyrna» ulttyq-etnografıalyq birlestigi uıymdastyrdy.
