AQSH-tyń eks-prezıdenti kishi Djordj Býsh endi ýaıymsyz, typ-tynysh uıyqtaı berse bolady. Ol 36 jastaǵy óziniń kishi qyzy Barbara Býshty turmysqa berdi. Endi ata atanyp, nemere súıýdi asyǵa kútip júr. Qamshy.kz aqparat agenttigi sheteldik BAQ-tardan ákesi tanymal eks-prezıdent bolǵan qalyńdyqtyń toıy týraly aqparatty jınap, oqyrman nazaryna usynady.
Barbara Býsh ózimen jasy shamalas 37 jastaǵy asa qatty tanymal emes akter ári senarıst Kreıg Koınǵa turmysqa shyqty. Olar byltyrǵy jyldyń qarasha aıynda tanysqan. Araǵa bes apta salyp Kreıg Koın Barbaraǵa sezimin bildirip, usynys jasaǵan. Al atastyrý rásimi 1943 jyly Úlken Djordj Býsh pen onyń jubaıynyń neke qıǵan jerinde ótken.
Bul toıdyń basty keıipkeri Barbara Býsh "Bul toı óte qysqa ári óte tátti estelikterdi qaldyrdy", dep jazdy óziniń áleýmettik paraqshasyna.
Bir jylǵa jýyq jaqyn aralasqan Barbara men Kreıg ara-qatynasyn osy kezge deıin jasyryp kelgen. Tipti aqsúıekter otbasy bul toıdy da qupıa túrde, halyqty shýlatpaı, kópshiliktiń nazarynan tys ótkizýdi josparlaǵan. Alaıda Barbara Býshtyń anasy shydamsyzdanyp, toı sýretterin óziniń áleýmettik jelisine jarıalady.
AQSH-tyń eks-prezıdenti kishi qyzyn qalaı uzatty dep oılaısyz? Tańǵalarlyq toı kóılegi, kóz jaýyn alatyn saraı jáne qazir sánge aınalǵan birneshe qabatty tort pen tanymal jaryq juldyzdar men júzdegen qonaqtar. Dál osylaı elestettińiz be? Ókinishke qaraı joq. Toı siz oılaǵannan múldem basqasha ótti. Bizdiń eldegi toılarǵa qaraǵanda óte-móte qarapaıym deńgeıde ótti.
Amerıkanyń 43-prezıdenti qyzyn ákesiniń Atlant muhıtynyń janynda ornalasqan Kennebankporttaǵy qara shańyraqta shaǵyn toı jasady.
Kóptegen qyzdardyń armany aq boz atty hanzadaǵa jolyǵyp aq kóılek kıý ekeni belgili. Al ákesi de atasy da AQSH-tyń prezıdenti bolǵan qalyńdyq Vera Vong dızaıneriniń jibekten tigilgen kóılegin tańdaǵan. Al qolyna Barbaranyń atasy úlken Djordj Býshtyń sonaý 1970 jyldary jubaıyna syılaǵan bilezigin taqqan. Boldy. Asyp-tasyp bara jatqan baılyǵy bolsa da ústi basyna gaýhardy, altyn-kúmisti jabystyra bergen joq. Sonymen birge bes tonna makıaj túgili erekshe shash úlgisin de jasamaǵan. Barlyǵy qarapaıym biraq ádemi ótken.
Qazaqtardyń da, amerıkalyqtyń da týǵan-týys, dos jarany kóp. Biraq amerıkalyqtar toıǵa barlyǵyn birdeı shaqyra bermeıdi. Jurt nazarynan tys ótken toıǵa 20 shaqty jaqyn adamdar ǵana shaqyrylypty. Olardyń qatarynda Barbaranyń egizi Djenna da bar. Aıta ketken jón bir-biri úshin ólip-óship turatyn apaly-sińili ekeýi jaqynda «Alǵashqy bolyp ápkem» («Snachala sestra») atty avtobıografıasyn jaryqqa shyǵardy.
Djenna Barbaradan birneshe mınýt keıin dúnıege kelse de ápkesiniń aldyn orap, birinshi bolyp turmysqa shyqty. Kishi Djordj Býsh 2013 jyly ata atandy. Tuńǵysh nemeresiniń atyn Margaret qoıdy. Araǵa 2 jyl salyp Djenna ekinshi ret ana atanyp, qyzdy boldy. Onyń atyn Poppı dep qoıdy. Endigi kezek Barbaraǵa kelgen syńaıly.
Iá, aqsúıekterdiń toıy osylaı qarapaıym ótedi. Al biz kórpemizge qaraı kósile almaı júrmiz. Ókinishti-aq... Eliktegish bolsaq, shet eldiń osyndaı qasıetterinen úlgi alsaq qaıtedi?! Bizdiń qazaqtyń arasynan mıllıoner sıaqty toı jasaıtyn mıllıonerdi de, aı saıyn alatyn jalaqysyn kelesi aıǵa jetkize almaı, qınalyp júretin qyzmetkerdi de tabasyz. Sondaǵy maqsat basqa týǵan-týystyń sózine qalmaı, dos-jarannyń ósegine aınalmaýdyń qamy. Batys elderi ne úshin damyp jatyr?! Sebebi olar básekelestik degen uǵymdy paıdaly jaǵynan qoldana biledi. Naqtyraq aıtsaq, shet eldikter básekelestik arqyly paıda tabady. Al bizder básekelestik arqyly shyǵynǵa batamyz. Bar aıyrmashylyq ta osynda. Oılanaıyq, ózgeriske umtylaıyq!
