Almatyda 50 jyldan beri turǵan aýyz sý ysyrmalary jappaı aýystyrylyp jatyr. Óıtkeni, qalany tirshilik nárimen qamtamasyz etýde mańyzdy ról atqaratyn qurylǵylardyń toz-tozy shyqqan.

Bıyl ábden eskirip, isten shyǵýdyń az aldynda turǵan ysyrmanyń 16 danasy jańalanady. Tek jóndeý kezinde qalanyń Alataý, Jetisý jáne Túrksib aýdandarynyń halqyna tirshilik nárin berý ýaqytsha toqtatyldy. Bul másele qalaı sheshilýde? Aýyz sý qashan qaıta qosylady?  

Aýqymdy jóndeý jumystaryna erte qamdanǵan «Almaty Sý» mekemesi kópqabatty turǵyn úılerge 1 apta buryn eskertý qaǵazdaryn ilgen. Oǵan qosa, tirshilik náriniń ýaqytsha joqtyǵyn sezdirmes úshin Alataý, Jetisý jáne Túrksib aýdandaryna 50 shaqty sý tasyǵysh kólik te jiberipti. Qazir olar kóshelerdi aralap, halyqqa tirshilik nárin tasyp júr. Al halyq jóndeý kezinde eshqandaı qolaısyzdyqtyń týyndamaǵanyn aıtady.

Aýqymdy jóndeý ysyrmalardyń ashylyp-jabylýy qıyndap, ábden eskirgendikten qolǵa alyndy deıdi mamandar. Al qurylǵylardy aýystyrǵannan keıin júıe jańalanyp, derbes basqarylatyn bolady. Óıtkeni, oǵan deıin birneshe ysyrma jabyq kúıinde qalyp ketken. Eger olar isten shyǵa qalsa, barlyǵyn birdeı ashyp jasaýǵa týra keletin. Endi dúıim jurt tirshilik nárinen múldem muqtajdyq kórmeıdi.

«Biz jumysty jedeldetip, meılinshe ýaqtyly oryndaýǵa tyrysyp jatyrmyz. Bul jumys ne beredi? Bul óte úlken sý qabyldaǵysh. Odan qalaǵa 3 úlken júıe tartylǵan. Osy 3 júıeniń arasyn baılanystyratyn, bir-birine aýysyp turatyn ysyrmalardyń tozyǵyna jetkenine baılanysty jóndeý jumystary atqarylýda. Ysyrmalar buryn apatty jaǵdaıda turǵan edi», – dedi «Almaty Sý holdıńi» MKK bas dırektorynyń birinshi orynbasary Nýrıddın Jarbolov.

2 kún ishinde Qulja tas joly boıyndaǵy 1000, 1200 jáne 1400 mılımetrli ysyrmalardyń 16 danasy tolyqtaı jańasyna aýystyrylady. Keń sheńberli qurylǵynyń arqasynda Talǵardan qalaǵa táýligine 320 myń tekshe metr sý ótedi. Aıta keteıik, búgin ysyrmalar ornyna qoıylyp, dánekerleý jumystary aıaqtalýǵa jaqyn. Al keshke deıin bul jumystar bitip, erteń qaıta sý berý jumystary kezeń-kezeńimen júzege asady.

«Eń sońǵy, dánekerleý jumystary ǵana qaldy. Sodan keıin barlyq haýyzǵa sý toltyryp, daıyn turǵan sýdy qalaǵa qosamyz. 2-3 saǵattyń ishinde tehnologıalyq rejımge shyǵyp, barlyq jerdegi qysymdy rettep, sodan soń qaıtadan burynǵy rejımge kóshemiz», – dep túsindirdi Nýrıddın Jarbolov.

Aıta keteıik, qazir Talǵar sý qoımasynda 24 myń tekshe metr, Almatydaǵy sý sorǵyshy stansasynda 20 myń tekshe sý qory bar. Arnaıy tehnıkalarmen jasaqtalǵan, dánekerleýshi quraldar men sorǵylarmen qamtamasyz etilgen 30 brıgada jumysty ýaqytynda bitirýge at salysyp jatyr.