Qazaqstan Respýblıkasy Prezıdenti Ákimshiliginiń jáne Almaty qalasy máslıhatynyń kelisimimen Almaly aýdanynyń ákimi bolyp Bekqalı Torǵaev taǵaıyndaldy. Óz kezeginde, Altaı Rahymbetov Bostandyq aýdanynyń ákimi atandy.
Almaty ákimdiginde olardy tanystyrý barysynda qala ákimi Baýyrjan Baıbek aýdandarǵa jańa taǵaıyndalǵan ákimderdiń qyzmettik ósý joldarynda barlyq satylardan ótkenderin jáne qala problemalaryn jaqsy biletinderin atap ótti. Olardyń aldyna prınsıpti jáne turaqty qadaǵalaýdy talap etetin birinshi kezektegi mindetter qoıyldy.
«Aýdandardyń jańa ákimderi abattandyrý, jasyldandyrý jumystaryn odan ary jalǵastyrýǵa, kóshelerdi jóndeýge, ǵımarattardyń arhıtektýralyq kelbetterine aıryqsha nazar aýdarǵandary jón. TÚKSH-ti modernızasıalaý aıasynda úılerdi jóndeýdi jalǵastyryp, «Eski turǵyn úı» baǵdarlamasyn myqtap qolǵa alýlary tıis», – dedi qala ákimi.
Aýdan ákimderine Bilim jáne Densaýlyq saqtaý basqarmalarymen birigip, mektepterdegi oqýshy oryndarynyń jetispeýi men emhanalardaǵy syrqattar tyǵyzdyǵy máselesin sheshý tapsyryldy.
Aıta keterligi, Almaly aýdanynyń jańa ákimi Bekqalı Torǵaev 5 jyldan astam ýaqyt Áýezov aýdanynda osy qyzmetti atqardy. 2015 jyldyń aqpanynan bastap Bostandyq aýdanynyń ákimi atandy.
Úsh jyl ishinde aýdanda salyq túsimi 22%-ǵa, shaǵyn jáne orta kásiporyndar sany 12%-ǵa, negizgi kapıtal ınvestısıasy 28%-ǵa artty. 13 myńnan astam jańa jumys ordnary ashyldy. 1,3 mln sharshy metr turǵyn úı iske qosyldy, aýlalardyń 47%-y, jerasty ótpeli joldardyń barlyǵy jóndeldi.
Óz kezeginde, Bostandyq aýdanynyń jańa ákimi Altaı Rahymbetov eńbek jolyn 1995 jyly Almaty qalasy Ekologıa basqarmasynyń mamany retinde bastady. Qorshaǵan ortany qorǵaý salasynda 20 jyl boıyna eńbek etti, sonyń ishinde, Almaty qalasy Tabıǵatty retteý basqarmasynyń basshysy da boldy. 2015 jyldyń aqpanynan Áýezov aýdanynyń ákimi qyzmetin atqardy.
Osy ýaqyt ishinde aýdandaǵy salyq túsimi 74%-ǵa, bólshek saýda aınalymy 60%-ǵa, ınvestısıa 40%-ǵa artty, 15 myńnan astam jańa jumys orny quryldy. 6 memlekettik jáne 60 jeke balabaqsha ashyldy.
