Túrkıa azamatynan taıaq jegen jedel-járdem júrgizýshisi Nıkolaı Kýchma zań buzýshyǵa keshirim berdi. Mundaı sheshim qabyldaýyna Túrkıa azamatynyń emshektegi balasy men áıeli bar ekeni eskerildi. Bul týraly onyń senim bildirýshisi Andreı Dıdenko habarlady.
«Zábir kórgen Nıkolaı Kýchmanyń moraldyq jáne materıaldyq shyǵyny óteldi. Olar sommany aıtpaýdy ótindi. Nıkolaı Kýchma Almaly aýdandyq soty men Almaly aýdandyq Prokýratýraǵa Demır Ebýzer Alıge qatysty qozǵalǵan qylmystyq isti toqtatýdy surap ótinish jazdy. Sońǵy núkteni sot qoıady», - deıdi Andreı Dıdenko.
• Úlkenge qol kótergen Túrkıa azamaty keshirim surady (vıdeo)
• Úlkenge qol kótergen buzaqy Túrkıa azamaty bolyp shyqty (vıdeo)
Nıkolaı Kýchmanyń Túrkıa azamatyn keshirgenin estigen jeli qoldanýshylarynyń kóbi «isti sońyna deıin jetkizý kerek» dep pikir bildirgen. Andreı Dıdenko jedel járdem júrgizýshisin bul áreketi nege negizdelgenin de túsindirip ótti.
«Barlyq jaǵdaıdy eskere otyryp sot Túrkıa azamatyn bas bostandyǵynan aıyryp, memleketkettiń paıdasyna úlken kólemde aıyppul salar edi. Saraptama kórsetip otyrǵandaı, sot tájirıbesinde jábirlenýshige moraldyq shyǵynǵa kóp ótemaqy bermeıdi. Tipti arty ólimge soqsa da. Bul - sot «jaman» degendi bildirmeıdi. Qarapaıym azamattardyń kirisi men jalaqylary kóp emes. Sondyqtan sot moraldyq shyǵyn retinde kóp aqshany taǵaıyndaı almaıdy», - dep túsindirdi Andreı Dıdenko.
Esterińizge sala keteıik, ózge ult ókili jedel járdem júrgizýshisin soqqyǵa jyqqan vıdeo áleýmettik jelide taraldy. Oqıǵa Almaty qalasyndaǵy Maqataev kóshesinde bolǵan.
60 jastaǵy Nıkolaı Kýchmanyń beti jaraqattanyp, qabaǵy jarylǵan. Oqıǵadan keıin aýrýhanaǵa jetkizildi. Júrgizýshige qol jumsaǵan Túrkıa azamaty Demır Ebýzer Alıge qatysty QR Qylmystyq kodeksiniń 1-bap 293 bóligi («Buzaqylyq») boıynsha qylmystyq is qozǵalǵan.
