Infraqurylymdyq jobalary tolyqtaı aıaqtalǵan Indýstrıaldy aımaqqa qyzyǵýshy kásipkerler qarqyny artqan. Búgin 4 rezıdent atalǵan aýmaqta óz taýarlaryn shyǵarý úshin kelisim-shartqa otyrdy. Onda qandaı taýarlar shyǵarylmaq? Bas-aıaǵy 490 gektar aýmaqty alyp jatqan aımaqta 3 jyldyń ishinde qansha zaýyt ónim óndirýge múmkindik ala alady?
Bıyl Almatynyń Indýstrıaldy aımaǵynda 9 zaýyt túrli taýar shyǵarýdy kózdegen. Onyń ekeýi endigi iske qosyldy. Biri joǵary tehnologıalyq toqótkizgish kabel ónimderin shyǵarsa, ekinshisi – metal gabıon toryn jasaıtyn avtomattandyrylǵan kásiporyn. Jeltoqsan aıyna deıin taǵy da 7 kásiporyn iske qosylady. Óndiris oryndary munaı óndirisine qajetti qubyrlar, ónimdi oraıtyn arnaıy juqa plenkalar, medısınada bir rettik qoldanylatyn zattar men arhıtektýralyq dekoratıvti qasbetti jasaýǵa kirispek. Al kelesi jyly taǵy da 16 kásiporyn óz jumysyn bastaıdy.
«Indýstrıaldy aımaqta óndiris oshaǵynyń barlyq túrin júzege asyrýǵa jaqsy jaǵdaı jasalǵan. Anyǵyn aıtqanda, ınjenerlik komýnıkasıadan myqty qýat kózi qarastyrylǵan. Atalǵan aımaqta, 80 megavattyq eki qosalqy stansıa jumys isteıdi. Indýstrıaldy aımaqtaǵy 490 gektar jerdiń 200 gektaryna ınfraqurylymdyq jumystar júrgizilgen. Kásipkerlerge berilgen jer telimi – 189 gektardy quraıdy. Qazir bos jerdiń aýmaǵy – 82 gektar», – dedi «Almaty Indýstrıaldy aımaǵy» JSHS bas dırektory Muhtar TURABEKOV.
Indýstrıaldy aımaqta 2021 jyly sońǵy kásiporyn iske qosylady. Ol eń úlken balmuzdaq shyǵaratyn fabrıka bolmaq. Qazir óndiris oshaǵynyń jobalyq-smetalyq qujattary daıyndalýda. Atalǵan aýmaqta óz isin bastaýǵa nıet bildiretin rezıdentterdiń sany 3 jylda 60-tan asady dep kútilýde. Búgin sonyń 4 kelisim-shartyna qol qoıyldy. Solardyń alǵashqysyna – mashına jasaý salasyndaǵy elektr energıasyn taratý jáne basqarý qurylǵysyn óndirý jobasyna 300 mıllıon teńge ınvestısıalyq qarjy qarastyrylǵan. Temir tulpar qurastyrý isinde jumys isteıtin metal óńdeý, mobıldi korpýstar men qaqpalar jáne rollerlerdi shyǵarý jobasy da qolǵa alynbaq. Al 250 mıllıon teńgedeı qarjy hımıa óndirisine jumsalmaq. Sondaı-aq, munaı óndirisine qajetti qubyrlardy shyǵarýmen aınalysatyn óndiristik jelisin salý kózdelgen.
«Bizdiń iske qosýdy kózdep otyrǵan zaýytymyz metal óńdeý jáne ony qurastyrýmen aınalysatyn bolady. Óndiris qýattylyǵy jylyna 3 myń tonnany quraıdy. Shtat boıynsha 230 adamdy jumyspen qamtý kózdelgen. Iaǵnı, kásiporynda eki aýysymda eńbek etý qarastyrylǵan», – dedi óndiris ornynyń atqarýshy dırektory Stavakýlı MAKSEN.
2021 jylǵa deıin Indýstrıaldy aımaqta naqty kelisim boıynsha 41 joba júzege asyrylady. Oǵan tartylatyn ınvestısıa kólemi –155 mıllıard teńge. Esesine, 5 myń adam jumyspen qamtylmaq. Búginde bes kompanıa óz jumysyn sátti júrgizýde.
Sońǵy segiz aıdyń ishinde Almatyda 500 mlrd teńgeniń ónimi óndirilgenin eskersek, basym bóligi dál osy Indýstrıaldy aımaqqa tıesili eken. Inovasıalyq kásiporyn ashýǵa qaýqarly iskerlerdiń bastamasyna tosqaýyl joq. Sondyqtan tyń ıdeıaǵa toly joba sany edáýir artýy yqtımal. Al qalalyq ákimdik tarapy ınfraqurylymdyq jumystardy júrgizip, salyqtyq túsimderdi túsirip berýge ázir.
