Almaty qalasynda urlanǵan uıaly telefondar syrtqa shyǵarylady, ıaǵnı Qyrǵyzstan men Tájikstanǵa ketedi. Bul týraly Almaty qalasynyń ákimi Baýyrjan Baıbek Úkimet otyrysynda málimdedi.

Úkimet basshysy Baqytjan Saǵyntaev Almaty qalasynda uıaly telefon urlaý faktileri óte kóp ekenin atap ótti. Al qala ákiminiń aıtýynsha urlanǵan telefondar shetelge ketedi.

«Uıaly telefondar boıynsha polısıa jumys istep jatyr. Mınıstrimiz bir suhbatynda satýshylar ózderi tapsyrys beredi dep aıtyp ketti. Uıymdastyrylǵan qylmystarǵa polısıa taldaý, zertteý jumystaryn jasap, profılaktıkalyq jumysty kúsheıtý kerek. Sol boıynsha naqty jospardy qoıdyq. Onyń bárin talqyladyq», - dep jaýap berdi qala basshysy.

Onyń aıtýynsha, urlanǵan telefondar el ishinde satylmaıdy. 

«Munda satpaıdy, Qyrǵyzstan men Tájikstanǵa tikeleı alyp kete beredi. Shekarada jumystardy kúsheıtip, osyǵan jol bermeý kerek. Áıtpese kompanıalar tirkelmese, erteń telefondardy qala turǵyndary qoldana almaıdy. Biraq ol shetelge ketip jatyr. Polısıamen jumysty kúsheıtip, shekara arqyly joldaryn jabý kerek. Sonda ǵana uıaly telefondar urlyǵy azaıady dep oılaımyn», – dedi Baıbek.

Qala ákimi Almatydaǵy qylmystyń kóbeıý tendensıasy burynnan bar dep atap ótti.

«Elimizdegi 20% qylmys Almaty qalasyna tıesili. Bizdiń qalamyzda Qazaqstan boıynsha halyqtyń 16%-yn quraıdy. Onyń ústine, ishki mıgrasıa óte joǵary. Jalpy 20% bolǵanda, on jyldan astam solaı bolǵan. Ýchaskelik polıseılermen jumys isteýdemiz. Sondaı-aq, avtobólshek satyp jatqan «Karsıtı» bazaryn japtyq», – dep sózin túıindedi ol.

Esterińizge sala ketsek, buǵan deıin premer-mınıstr Baqytjan Saǵyntaev «uıaly telefondy shynjyrmen baılap, qaltaǵa salamyz ba endi?», dep urlyqtyń keńinen taraǵan osy túrin synaǵan bolatyn.