Astanadaǵy Esil aýdandyq №2 sotynda Qyzylorda oblystyq İİD bastyǵy Qaırat Muhıtovtyń qyzy Malıka Muhıtovaǵa qatysty qylmystyq istiń soty bastaldy. Ol Oljas Súleımenovtyń nemeresi qaıtys bolǵan jol-kólik oqıǵasyna qatysy bar dep aıyptalýda. Bul týraly NUR.KZ tilshisi habarlady.
Aǵymdaǵy jyldyń maýsym aıynda sheteldik kólik mingen Malıka Muhıtova motosıklmen kele jatqan Eskendir Súleımenovpen soqtyǵysqan. Jas jigit oqıǵa ornynda kóz jumǵan bolatyn.
Malıka Muhıtova sotqa úsh áıelmen birge keldi. Onyń qorǵaýshysy Dmıtrıı Kýráchenko. Al jábirlenýshi tarapty Damır Saǵynov tanystyrýda. İsti qaraıtyn sýdıa Qanat Tabaǵalıuly.
Malıka Muhıtova Qylmystyq kodekstiń 345 baby boıynsha aıyptalýda. Sot otyrysyn ashyq dep jarıalaǵan sýdıa onyń ashyq rejımde ótetinin málim etti.
Osydan keıin ol aıyptalýshy týraly málimetterdi oqydy. Malıka - 1989 jyly týǵan. turmys qurmaǵan. "Samuryq-Qazyna" AQ-da joǵary aǵa menedjer bolyp qyzmet etken.
Aıta keteıik, sot aldynda eki taraptyń da qorǵaýshylary qylmystyq isti qaraýdy keıinge shegerý týraly usynys jasady. Sebebi jábirlenýshi jaqtan kýágerlik etetin adamdar alystan kele almaı qalǵan. Al Kýráchenko sot otyrysyna jol-kólik oqıǵasy bolǵan oryndy teksergen polıseı men marqumdy qaraǵan dárigerlerdiń jáne Eskendir motosıkl aıdaýdy úırengen avtomektep ókilderin de shaqyrtý kerek dep sanaıdy.
"Meniń qorǵalýshym óz kinásin moıyndap, ókinetinin aıtyp, shyǵyndy tolyq óteýge keliskenimen, áli onyń naqty kólemi áli anyqtalǵan joq", - dedi Kýráchenko.
Advokattyń sózine súıensek, Muhıtovanyń jol-kólik oqıǵasyna qandaı jyldamdyqpen kelip túskeni de áli belgisiz. Sondyqtan ol qosymsha avto-fototehnıkalyq saraptama júrgizip, barlyǵyn jiti anyqtaý qajet dep otyr.
Alaıda jábirlenýshi tarap qosymsha saraptama júrgizýge qarsylyq tanytty. Sebebi ol úsh aıǵa sozylǵan sotqa deıingi tergeý kezinde mańyzdy saraptamalar jasalyp, nátıjesi is materıalyna qosylǵan.
"Kýágerlerlerdi qaıta shaqyrtýǵa da qarsylyq bildiremin. Olardan jaýap alyndy, is materıalynda olardyń hattamalary tur. Sony jarıa etýdiń ózi jetkilikti dep sanaımyn", - dedi Saǵynov.
Memlekettik aıyptaýshy da qosymsha saraptamalar men kýágerlerdi qaıta shaqyrtý istiń odan ári sozylyp ketýine alyp keletinin aıtty.
Nátıjesinde sot aıptalýshy men jábirlenýshi taraptyń jáne aryzda aty atalǵan kýágerlerdiń tolyq quramda qatysýymen istiń qaıta qaralatynyn málim etti.
Endi kelesi sot otyrysy 17 qazanda ótetin boldy.
