Qysqy Ýnıversıada-2019 alaýynyń estafetasy elimizge jetti. Alqyzyl alaýdy ustaýshylar Almatydaǵy Abaı dańǵylynyń boıymen Balýan Sholaq atyndaǵy sport saraıynan bastap, Respýblıka saraıyna deıin júgirip ótti.

Sportshylar qatarynda boksshy Qanat Islam, fýtzalshy Dinmuhambet Súleımenov, álpınıs Maqsut Jumaev jáne ózge de sport qaıratkerleri bar. Marshrýt uzaqtyǵy 2 shaqyrymdy qurady.  

«Óz elimiz úshin óte qýanyshytymyn. Bul oqıǵany Táýelsizdigimiz úshin úlken mártebe dep oılaımyn. Bizdesportqa qyzyǵýshylyq tanytatyn qanshama jas ósip kele jatyr. Osy sát olarǵa úlken bir rýhanı kúsh, rýhanı azyq dep oılaımyn. Bolashaqta qazirgi stýdentter arasynan álemdik Olımpıada tórinen oryn alatyn, elimizdiń týyn kóteretin myqty azamattar shyǵady dep oılaımyn», – dedi boksshi Qanat Islam.

Jýyrda saltanatty sherý Qytaıdyń Harbın qalasynda jalǵasady. 29-shy Dúnıejúzilik qysqy Ýnıversıada kelesi jyly 2-12 naýryz aralyǵynda Reseıdiń Krasnoıarsk qalasynda ótedi.  

«20 qyrkúıekte Italıanyń Týrın qalasynda aıtýly jarystyń alaýy tutanǵan bolatyn. Búgin alaý tutatýdyń ekinshi kezeńi jalǵasýda. Qazaqstanda ótip jatqan rásim uzaqtaý bolyp tur. Qazaqstan – óte qonaqjaı el. Bul elde aýqymdy sporttyq jarystar jıi ótip turady», – dep atap ótti Reseıdiń stýdentter sporty odaǵynyń prezıdenti Sergeı Seıranov.