Almatyda taǵy birneshe baǵyttyń avtobýstary jańardy. Qala basshysy Baýyrjan Baıbek jumys sapary kezinde jeke tasymaldaýshylar alǵan birqatar baǵyttardy, sonyń ishinde qalaǵa jaqyn aýmaqtardy qamtıtyn jańa qoǵamdyq kólikterdi kórdi.

№23 jáne 78-shi baǵyttaǵy qoǵamdyq kólikter Qyrǵaýyldy – Besaǵash jáne Saıahat avtobeketi – Jalpaqsaı eldimekeni baǵyttary boıynsha júredi, kúnine ortasha eseppen, 15 myńǵa deıin jolaýshy tasymaldaıdy. Megapolıs basshysy sýbsıdıa bólý arqyly jyljymaly quramdy jańartqan avtoparkterge qoldaý kórsetiletinin aıtty. Degenmen, tasymaldaýshylar júrgizýshilerdiń mádenıetin jáne qyzmet kórsetý sapasyn arttyrýlary tıis.

«Biz avtobýstarǵa barynsha jaqsy jaǵdaı jasap jatyrmyz. Qala búdjetinen aqsha da bólip jatyrmyz. Sondyqtan sapasyna da aıryqsha kóńil bólý kerek. Avtobýspen júretin adamdar sany qazirdiń ózinde ósip jatyr. Ony ózderińiz de baıqaǵan shyǵarsyzdar, biz bul úrdisti barynsha qoldaıtyn bolamyz», – dedi Almaty qalasynyń ákimi Baýyrjan Baıbek.

Bulardan ózge, «Oljas LTD» avtoparki jyljymaly quramnyń taǵy tórt birligin satyp alǵan. Syıymdylyǵy ortasha avtobýstar №62 baǵyt boıynsha júredi, jolaýshy aǵyny artqandyqtan, burynǵy jańarǵan avtobýstardyń qataryn tolyqtyrady.

Jalpy, jyl aıaǵyna deıin jańarǵan qoǵamdyq kóliktiń úlesin 80 paıyzǵa deıin jetkizý josparlanǵan.