Almatyda jylytý maýsymyna daıyndyq aıaqtalýda. Qazirgi tańda kóshelerdegi jóndeý jumystary bitip, qazylǵan joldar tegistelip jatyr. Almaty jylý júıeleri mekemesi qubyrlardy jańartýdy qyrkúıek aıynda bitirdik dep otyr. Onyń ústine, bıyl isine salǵyrt qaraǵan merdiger mekemeler bolmapty.  Sondyqtan, jylý keshikpeı beriledi dep sendirdi mamandar.    

Almaty jylý maýsymyna saqadaı saı. Mamandar bıyl da jaz boıy tot basqan komýnaldyq jelilerdi jańartyp úlgergen. Qazir olar iske qosylyp, qalypty rejımde jumys istep jatyr. Sondaı-aq, qubyrlar gıdravlıkalyq synaqtan ótkizilip, ketken kemshilikter tolyqtaı qalypqa keltirildi. Energetıka kesheni kómir men mazýttyń apatty jaǵdaıdaǵy qorymen tolyq qamtamasyz etilgen.

«Otyn-energetıka kesheniniń kásiporyndary 96 paıyzǵa daıyn. Qaladaǵy «Almatyjylýkommýnenergo» mekemesiniń jóndeýden shyqqan 78 dana jylý qazandyǵy búginde 100 paıyzǵa daıyn boldy. Sonymen qatar, mazýt jáne jyl sońyna deıin kógildir otyn tasýǵa kelisim-shart qoıylǵan. Qos jylý elektr stansıasy jáne Almaty jylý júıeleriniń batys jylý keshenindegi daıyndyǵy 80 paıyzǵa aıaqtaldy. Kesteler, qajetti qural-jabdyqtar quramy da jylý maýsymyna daıyn», – dedi Almaty qalasy Energetıka jáne komýnaldyq sharýashylyq basqarmasy basshysynyń orynbasary Erbolat Amanǵalıev.

Bıyl 12 shaqyrym jylý jelisi, 23 kılometr elektr jelisi, 300 shaqyrymǵa jýyq sý jáne 267 kılometr káriz júıesi qaıta jasalǵan. Halyqty jylýmen qamtıtyn mamandar aldymen áleýmettik nysandardyń daıyndyǵyn pysyqtap jatyr.

«Kóp qabatty turǵyn úıler, áleýmettik nysandar, ıaǵnı densaýlyq saqtaý jáne bilim berý mekemeleri búgingi tańda jylý maýsymyna 100 paıyzǵa daıyn dep senimmen aıta alamyz. Daıyndyqtaryn dáleldeıtin aktini qoldaryna aldy», – dedi Erbolat Amanǵalıev.

Mamandar jylý beriler kezde aýa temperatýrasy eskeriletinin aıtady. Jylý bıyl da jyldaǵydaı qazan aıynyń ortasynda jiberilýi bek múmkin.