Almaty turǵyndaryn medısına uıymdaryna tirkeý naýqany bastaldy. Jyl saıynǵy naýqan 15 qyrkúıekten bastap, 15 qarashaǵa deıin jalǵasady. Azamattar «Medısınalyq saqtandyrý qorynyń» «Halyqtyq baqylaý» mobıldi qosymshasy arqyly klınıkalarmen tanysyp, ózindik tańdaý jasaı alady. 

«Bıylǵy jyly tirkelý barysynda 1 dárigerge túsetin júkteme 1700 adamnan aspaýy tıis. Buryn bizde 1 dárigerge 2 myń adamǵa deıin qyzmet kórsetýge ruqsat berilgen bolatyn. Bizdińshe, bul jańa ýchaskelerdiń ashylýyna túrtki bolýy tıis jáne bul máselede bıznes ókilderi, jeke bıznes ókilderi ózderiniń belsendiligin tanytady dep kútip otyrmyz», – dedi «Áleýmettik medısınalyq saqtandyrý qory» Almaty qalalyq fılıalynyń dırektory Tileýhan Ábildaev.

Almaty turǵyndaryna 77 emdeý mekemesi qyzmet kórsetedi. Onyń ishinde, 7 kompanıa alǵash ret qatysyp otyr. Tipti, aralarynda jekemenshik klınıkalar da bar. Olar tirkelgender úshin tegin qyzmet kórsetedi. Mamandar tańdaý jasaý barysynda úıge jaqyn mańdaǵy emhanany tańdaýǵa jáne otbasylyq qyzmet kórsetý ustanymdaryna basymdyq berýge shaqyrdy. Erikti medısınalyq saqtandyrý polısi bar azamattar Qazaqstan aýmaǵyndaǵy emhanalar jelisine tirkelip, kez kelgen qyzmetke júgine alady.