Almatyda Astananyń kúnderi aýqymdy toılanyp jatyr. Onyń aıasynda josparlanǵan sharalar 19 qyrkúıekte bastalǵan. Aldaǵy demalys kúnderi qyzyqty qoıylym, konsert jáne kórmeler ótedi.

Astana kúni aıasynda ótken alǵashqy sharalardyń biri – «Ázil álemi» ázil-syqaq teatrynyń konserti. Ártister qoıylymda ómirden alynǵan shynaıy ázilder, onyń ishinde aýyldaǵy aǵaıyn, erli-zaıyptylar arasynda kezdesetin túrli jaıttar, qalalyqtardyń ómiri syndy taqyryptaǵy syqaq áńgimelerdi aıtyp, sahnalady.

Budan bólek, ashyq aspan astynda eń alǵash ret «Open Air» atty «Format» toby men ánshi Qaırat Baekenovtyń jeke shyǵarmashylyq konserti ótedi dep kútilýde. Ol demalys kúni «Astana» alańynda saǵat 19:00 de bastalady.

«Almatyǵa alyp kelgen baǵdarlamamyz óte aýqymdy. Tek konsertter emes, teatrlanǵan qoıylymdar da kórsetpekpiz. Atap aıtqanda, Q. Qýanyshbaev atyndaǵy Memlekettik akademıalyq qazaq mýzykalyq drama teatry, M.Gorkıı atyndaǵy memlekettik orys drama teatry, Jastar teatry, qýyrshaq teatrlary Almatyǵa kelip, jergilikti turǵyndarǵa ónerlerin kórsetetin bolady», – deıdi Astana qalalyq Mádenıet jáne sport basqarmasy basshysynyń orynbasary Narıma Abylqyzy.

Ábilhan Qasteev atyndaǵy óner murajaıynda otandyq jáne sheteldik sýretshilerdiń eńbekteri usynylǵan «Shekara» kórmesi ashyldy. Munda Eýropa men Azıanyń 11 eliniń 16 qalasynan kelgen sheberlerdiń jumystary qoıylǵan. Erekshe týyndylar arasynda án salýǵa, kıno kórýge jáne estelikke oramal alýǵa bolady. Týyndylar mýzeıdiń barlyq zalyn alyp jatyr. 20-dan astam eńbek buǵan deıin Reseıdiń Sankt-Peterbýrg, Krasnoıarsk, Kıev, Mınsk jáne Dortmýnd qalalarynda kópshilik nazaryna usynylǵan.  

«Elimizdiń atynan birneshe sýretshi óz jumystaryn usynyp otyr. Sonyń ishinde Sáýle Dúısenbına, ol Eýropa stılısıkasyn qoldana otyryp, túrli túsqaǵazdardy jasaǵan. Tematıkasy – ulttyq. Osy arqyly Eýropa men Azıany biriktirip otyr. Odan bólek, Ázirbaıjannan kelgen sýretshi Farhad Farzalıev «Mýgam-Karaoke» eńbegin usynǵan. Bul joba aıasynda júz jyldan asa tarıhy bar ulttyq mýzyka jańa tehnologıa arqyly jańǵyrtylyp otyr», – deıdi Á.Qasteev atyndaǵy óner murajaıynyń baspasóz qyzmeti jetekshisi Klara Isabaeva.

Al, jeksenbi kúni Medeý shatqalynda «Medeý» baspaldaq sharasy ótpek. Oǵan kez kelgen azamat qatysa alady. Buqaralyq sharanyń eń kishi jáne eń jasy úlken qatysýshylary 100 baspaldaqta synǵa túsedi. Budan bólek jas ereksheligine baılanysty taǵy 5 kezeń bar. Eń myqtylary 841 baspaldaqty eńserýi qajet.