Almaty men Astananyń kásipkerleri birlesip qonaqúı keshenderi men ónerkásip oryndaryn ashpaqshy. Búgin qos qalanyń bıznesmenderi 7 iri jobany júzege asyrý úshin ortaq memorandýmǵa qol qoıdy.

Yntymaqtastyq negizinde quny 65 mıllıon dollardan asatyn jobalar jedel júzege asyrylady. Budan bólek, almatylyq bıznesmender elordadaǵy tanymal alkogólsiz sýsyndardy óndiretin qoldanystaǵy zaýyttardy keńeıtip, óndiris kólemin arttyrýdy qolǵa alady.

«Maqsatymyz – jańa jobalardy júzege asyrý boıynsha tájirıbe almasý. Sondaı-aq, jańa qonaq úı salý boıynsha, Astana jáne Almaty qalalaryndaǵy óndiristi ulǵaıtý boıynsha osy jobanyń eki qalanyń ekonomıkasyna qosatyn úlesi úlken. Sebebi, el ekonomıkasynyń órleýinde de osy eki megapolıstiń úlesi joǵary jáne budan ári damytýǵa úlken kómegin tıgizedi», – dedi Astana qalasy Investısıalardy jáne kásipkerlikti damytý basqarmasynyń bólim basshysy Nurjan Áshimov.