Alataý aýdanynyń 10 jyldyǵyna oraı ardagerler konsert uıymdastyrdy. Halyq ánderi shyrqalyp, dástúrli kúı men jyrdan shashý shashqan belsendi turǵyndar osylaısha, jastarǵa úlgi kórsetti. «Ájeler» ansambli, «Erler qaýymy» toby, «Ardagerler» vokaly syndy ónerpazdar ulttyq qundylyqtarymyzdy nasıhattady.

Ákimdiktiń josparyna saı, qyrkúıek aıynda aýdandaǵy barlyq mektepterde merekelik sharalar uıymdastyrylǵan. Qaladaǵy eń belsendi ardagerler qalyń kópshiliktiń ystyq yqylasyna bólendi.  

«Alǵashqy Alataý aýdany qurylǵan ýaqytta 3 800 zeınetker bar edi. Qazir Alataý aýdanynda 16 120 zeınetker bar. Olardyń 17-i soǵys ardageri, 666-y – tyl eńbekkeri. Minekeı, bizdiń qarttarymyz da árbir is-sharada sol belsendiligimen alda keledi. 8 aýdannyń ishinde bizdiń aýdanymyz sporttan da, mádenı sharalardan da sońǵy 5 jylda ylǵı birinshi oryn alyp kele jatyr», – dedi

Alataý aýdandyq Ardagerler keńesiniń tóraǵasy Qudaıbergen Qabdollın.

«10 jyldyq merekemiz qutty bolsyn! Aýylymyz aman bolsyn, elimiz tynysh bolsyn! Bala-shaǵamyz ósip-órkendep, osy Alataý aýdanynda óse bersin, órkendeı bersin! Qanat jaıyp, Alataý aýdany kógerip, kókteı bersin!», – deıdi  qart turǵynTurahan Sársenbaeva.